[A:571] thams cad la | | rtag tu phul ba nyid du gyur | | de phul bsod nams tshogs yin te | | tshogs las dngos grub mchog tu 'gyur | | zhes sogs gsungs pas mtshon de 'dra mdo rgyud rnams su mtha' yas pa dag las 'dir cha shas tsam legs bsdu byas pa'o | |
(3) bla ma legs par bsten pa'i dgos pa |
gsum pa bla ma legs bsten gyi dgos pa ni | rtsa ba'i bla ma dge ba'i bshes gnyen mchog de nyid slob tshogs kyi ji bzhin legs par bsten pa'i dgos pa phan yon gyi tshul yang 'di bzhin te | de ltar gus bsten byed pa'i slob 'bangs rnams kyang sangs rgyas kyi go 'phang la nye ba dang rgyal ba rnams dgyes pa dang dge ba'i bshes gnyen gyis mi phongs pa dang ngan 'gror mi lhung ba dang las ngan pa dang nyon mongs pas thub par dka' ba dang | byang sems kyi spyod pa dang mi 'gal zhing de la dran pa dang ldan pas yon tan gyi tshogs kyis je mtho je mthor 'gyur zhing gnas skabs dang mthar thug gi don thams cad 'grub par 'gyur ba dang | de la bsnyen bkur bas bsam sbyor dge ba thob nas rang gzhan gyi don byed cing tshogs rdzogs par 'gyur ba'o | |
de ltar yang sdong po bkod pa las | rigs kyi bu dge ba'i bshes gnyen gyi yang dag par zin pa'i byang chub sems dpa' rnams ni ngan 'gror mi lhung ngo | | dge ba'i bshes gnyen gyis bsam pa'i byang chub sems dpa' rnams ni byang chub sems dpa' bslab pa dang 'gal bar mi byed do | | dge ba'i bshes gnyen gyis bskyangs pa'i byang chub sems dpa' rnams ni 'jigs rten las mngon par 'phags pa yin no | | dge ba'i bshes gnyen la bsnyen bkur byas pa'i byang chub sems dpa' rnams ni spyod pa thams cad la mi brjod par spyod pa yin no | | dge ba'i bshes gnyen gyis yongs su bzung ba'i byang chub sems dpa' rnams ni las dang nyon mongs kyis thub par dka' ba yin no | | zhes dang |
rigs kyi bu dge ba'i bshes gnyen gyis rjes su bstan pa la zhugs pa'i byang chub sems dpa' la sangs rgyas bcom ldan 'das rnams thugs mnyes par 'gyur ro | | dge ba'i bshes gnyen gyi tshig dang mi 'gal bar gnas pa'i byang chub sems dpa' la thams cad mkhyen pa nye bar 'gyur ro | | dge ba'i bshes gnyen gyi tshig la the tshom med pa la dge ba'i bshes gnyen rnams nye bar 'gyur ro | | dge ba'i bshes gnyen yid la byed pa dang ma bral ba la don thams cad mngon du 'gyur ro | | zhes pa dang |
gsang ba bsam gyis mi khyab pa las kyang | rigs kyi bu'am rigs kyi bu mo dag gis shin tu