[A:577] gyi khri'i drung na slob ma rgyal po yod pa'i mgo thog tu bla ma'i skyugs pa byung ba la byin rlabs byung snyam pa'i dad gus kyis rkang mgyugs kyi dngos grub thob cing | de nas mi mang pos bskor ba'i tshe | bla ma byon pa la yid kyis dad gus byas | dngos su mis 'phyas dogs nas phyag ma byas pas dngos grub yal skad | de lugs kyi lo rgyus gzhan yang 'phags bod gnyis kyi rdo rje 'dzin pa'i bla ma dang slob ma'i bsten tshul cung ma legs pa'i nyes sgo ci rigs bshad du yod la | khyad par bla ma bshes gnyen du byas nas bsten tshul log pa dngos gnas byung ba'i nyes dmigs ni | de ltar byed pa'i slob ma gang dag la tshe 'dir nad dang gdon du mas gtse ba dang phyi mar ngan 'gro'i sdug bsngal dpag tu med pa dus dpag tu med par myong bar 'gyur te | lag na rdo rje dbang bskur ba'i rgyud las | bcom ldan 'das gang dag slob dpon la brnyas par bgyid pa de dag gi rnam par smin pa ji lta bu lags | bcom ldan 'das kyis bka' stsal ba | lag na rdo rje | lha dang bcas pa'i 'jig rten skrag par 'gyur gyi de skad ma smra zhing | gsang ba'i bdag po | 'on kyang cung zhig brjod par bya yi | dpa' bo bsgrims te de nyon cig | | mtshams med la sogs mi bzad pa | | dmyal ba gang dag ngas bshad pa | | de rnams kyi ni gnas su brjod | | der ni bskal pa mtha' yas so | | de ltar bas na rnam kun tu | | de la nam yang brnyas mi bya | | zhes dang | lnga bcu pa las | slob dpon la ni smod pa de | | yams dang mdze dang nad rnams dang | | gdon dang rims dang dug rnams kyis | | rmongs chen de ni 'chi bar 'gyur | | rgyal po me dang sbrul gdug dang | | chu dang mkha' 'gro rkun po dang | | gdon dang log 'dren rnams kyis kyang | | bsad nas sems can dmyal bar 'gro | | nam yang slob dpon dag gi ni | | kun tu sems dkrugs mi bya ste | | gal te rmongs pas byas gyur na | | dmyal bar nges par 'tshed par 'gyur | | mnar med la sogs 'jigs rung ba'i | | dmyal ba bstan pa gang yin pa | | slob dpon la ni smod pa rnams | | der ni gnas par yang dag bshad | | ces gsungs la ltar dang | rgyud sgyu 'phrul drwa ba las kyang | yon tan bzung bas dngos grub cing | | skyon rnams kyis ni dngos grub nyams | | de yi grib ma'ang mi 'gom ste | | mchod rten bshig dang 'dra bar gsungs | | zhes gsungs pa ltar rang gis rtsa ba'i bla ma'i skyon brjod pas dngos grub thob zin pa'ang nyams par byed pa dang sku'i grib ma 'gom yug tu btang bas kyang mchod rten bshig pa'i nyes sgrib dang khyad par med pa yin zhing | gzhan yang bla ma bsten tshul log pas yon tan ma skyes pa rnams mi skye zhing skyes pa rnams kyang nyams nas 'gro ste | da ltar gyi sangs rgyas mngon sum pa'i ting nge 'dzin bstan pa'i sde snod las | gal te des de la mnar sems sam tha ba'am sdang ba'i sems kyis gnas la yon tan 'thob pa ni gnas med du | | ston pa'i 'du shes mi bskyed na'ang de bzhin no | |