[A:65] gnang | phyi bkod rdzogs pa dang nang bzhugs kyi sku rten sogs bzhengs skabs chos skyong rnams la gtor ma rgya cher btang nas las bcol gtad skabs gser gyi go khrab can gyi mi chen gnyis byung nas thugs kyi dgongs pa la bar chad gang yang med par slob dpon padma dang mkha' 'gro gsang ba ye shes sogs kyi byin rlabs dang bcas mnyam du grub po gsungs nas mi snang bar gyur to | | de nas rten rnams la rab gnas rje bla ma nyid dang slob dpon rgyal mtshan seng ges dbur bcas bu chen bcu gsum dang dge slong phyi nang tshul ldan brgya phrag gcig gis | gsang 'dus | dgyes rdor | dus 'khor sogs rgyud sde'i dkyil 'khor mang po'i zhal phyes te bsgrib mchod zhag bdun bar mdzad cing nyin re bzhin rab gnas phyag len thebs nges mdzad pas kun yid ches shing ngo mtshar ba'i ltas kyang dpag med byung la | de las thub ba'i dbang po'i sku gzugs las 'od zer gyi tshogs du ma gser btso ma'i mdog lta bu glog 'od 'khyug pa bzhin byung bas sa dang nam mkhar khyab cing 'od kyi phung po'i dkyil nas snyan pa'i sgra gdangs la | 'di ltar tshigs su bcad pa byung ba ste | bskal pa sngon nas mngon par byang chub kyang | | mtha' yas 'gro la byams brtse'i thugs bskyed mthus | | brgyad khri skal pa bzang po'i zhing khams las | | rdzogs ldan byams pas 'brel tshad lung bstan 'byung | | zhes pa'i dbyangs kyi sgra shin tu 'jam pa'i tshigs lan lnga'i bar du skyes bu kun gyi mthong thos su byung ngo | | de 'dra'i khang dmar gtsug lag khang chen pos gtsos dgon lag brgya dang bcu gsum | mchod rten brgya dang bcu gsum phyag 'debs mdzad | gzhan yang dpal dgu | rtse lnga | thang brgyad kyi bdag por gyur to | | nang gi bstan pa'i gnyer kha ba rgyal mo rong gi phyogs tsha kho ba ngag dbang grags pa'i dbon po chos grags rgya mtsho'i sku rigs kyi dbon du mdzad nas de las byung ba'i rigs rus kyang 'dzin pa shin tu mang ngo | | de nas dgung lo re dgu par rtogs pa bde chen gyi rang ngo hrig ger bzhugs nas gnas lugs gdod ma chen po 'khor 'das yongs khyab kyis brtan g.yo'i rol gar cir yang 'dzin pa'i mdzad pa mtha' yas pa'i rnam par thar pa don dam chos nyid kyi nyams mgur rdo rje'i glu dbyangs gsungs so | |de nas grwa slob mang po bcas gser shod nas brgyud ljags mda' dgon sogs dgon lag rnams la bka' 'phros kyi zhal gdams sogs kyis 'gro don mdzad | 'ba' lha sgang la chags phebs lo gcig bzhugs nas chos 'khor rgya cher bskor | de nas sa sku'i bla ma nam mkha' rgyal mtshan gyis spyan drangs te chos mang gsung skabs rnam rgyal chen mo'i mchod rten bzhengs | rab gnas skabs mchod rten las 'od zer byung ste sgra gdangs snyan pa byung ba kun gyis thos pas ya mtshan skyes pa sogs ngo mtshar ba mang | der kun gyis yun ring bzhugs zhus gsol yang chos skyong gis bskul bas ma gsan par slar 'dzam thang du phebs tshe gzhon nu rgyal mtshan pa'i yang sprul sku bzhis thog drangs dge 'dun stong