[A:78] drung du sdom gsum dang dbang lung man ngag mtha' dag zhus | theg mchog dbu ma sogs gzhan stong gi lta grub la sbyang | dbu ma'i rgyan la 'grel bshad cig byas pa rgyal tshab nyid kyis gzigs rtog mdzad | dus 'khor dang | 'jigs byed kyi bskyed rdzogs mthar phyin pa'i go don thugs la mnga' | bdud rtsi phug tu rje btsun gyi nye gnas grags pa dpal bzang la yang dbang lung man ngag mang du zhus | khyad par bektsa lcam srid gi rjes gnang srog gtad gnang ste 'phrin las tshul bzhin sgrub pa'i rtags mtshan gzigs | jo nang du mkhas grub blo gros rnam rgyal gyis bde mchog nag po'i dbang dang rwa ba tshul khrims rnam rgyal gyi phyag bris bde mchog dkyil thang gnang zhing mdo khams bstan pa'i sgron mer mnga' gsol | rje btsun kun dga' 'phrin las dbang mo'i drung nas gdams pa'i gnad ma lus pa zhus shing | khyad par zab lam rdo rje'i rnal 'byor gyi lus sbyong 'khrul 'khor gyi lag len gnang skabs rje btsun ma nyid zhabs rdo rje skyil drung bcas nas bar snang la yun ring bzhugs pa' grub rtags kyang bstan | khams su nges don gyi chos gzhi 'debs pa la bka' lung zhus te | rje btsun ma'i gsung las | dgon sa dbyibs dang khyad par ngo mtshar che ba dgun dus mtsho khar me tog rgyas pa rnyed | der bu khyod kyis dgon pa thob cig gsungs | sngon rje btsun chen po sku gshegs khar nyid kyi chos gos dang | mkhan rin chen rgya mtsho'i chos gos gnyis lhan du bzhag nas phyis su 'dir a mdo ba gnyis grwa sar 'ong la rten skal 'di ster gsungs pa ltar mkhan rin po che nas 'brog dge ba la rje btsun gyi sku chos dang | sgo nyin khyi gu rab 'byams pa la nyid kyi sku chos gnang ngo | | de nas sa ra ba dang mnyam du byon | rang yul du phebs nas bar skabs shig tu na che'i khar dgun dus su me tog gsar pa mang po gzigs pas der chos gzhi dgon gnas btab | nang rten byams chen sogs rten gsum mang po bzhengs | dpal tshes kha bsam 'grub gling zhes sku tshe'i smad la gnas der gdan phabs yi dam gyi lha mang po'i zhal gzigs chos skyong bsrung mas 'phrin las sgrub ste | nges don sgrub brgyud kyi bstan pa bskyangs nas sku dbon chos skyong don grub sogs slob bu mang ngo | |
5. sku dbon chos skyong don grub rtag brtan du yang phebs nas grub chen cha lung ba'i spyan sngar zab lam sbyor drug dang dus 'khor dbang chen sogs 'dod chos mang du gsan | slar rang yul du byon te 'brog dge'i gdan sa mdzad | |
6. de nas 'brog dge grags pa bsam 'grub kyis bskyangs |
7. de nas sku dbon kun dga' lhun grub pas rtsi nang du dgon pa btab |
8. de nas kun dga' yon tan rgya mtshos dgon der 'tshogs khang bzhengs pa dang | dge 'dun gyi sde gsar 'dzugs dang dus mchod smon lam sogs tshugs par mdzad cing dpal mi 'gyur nges