[A:308]ཆོས་མངོན་པའི་མཛོད་འགྲེལ་པ་འགྲེལ་བཤད་དང་བཅས་པ། མཆིམས་པའི་བཤད་སྲོལ་ལྟར་ནེའུ་པཎ་ཆེན་ལས་བརྒྱུད་པ་རྣམས་རྒྱས་པར་གསན། ཐང་སག་གི་ཆོས་གྲྭར་སྤྲུལ་སྐུ་གཞོན་ནུ་རྒྱལ་མཚན་གྱི་དྲུང་དུ། རྩ་འཇུག་བཞི་གསུམ་འགྲེལ་པ་དང་བཅས་པའི་བཤད་པ་པ་ཙབ་ལོ་ཙ་བའི་བཤད་སྲོལ་ཇི་ལྟ་བ་བཞིན་དུ་ལན་དུ་མར་གསན། སློབ་དཔོན་མཁས་པ་ལོ་པ་ཤཱཀྱ་རིན་ཆེན་ཞེས་བྱ་བའི་དྲུང་དུ། ཆོས་མངོན་པ་ཀུན་ལས་བཏུས་པ་འགྲེལ་པ་དང་བཅས་པ་གསན་ཅིང་མཁས་པར་མཛད་དོ༎
g.Yag ston's invitation to sNe gdong
དེ་ནས་མཁས་པ་ཆེན་པོ་འདི། མདོ་སྨད་པའི་གྲྭ་པ་རྣམས་ཀྱིས་སྤྱན་དྲང་ནས་རྗེ་ཕག་མོ་གྲུ་པའི་གདན་ས་ཐེལ་ན་བཤད་ཉན་མཛད་ཀྱིན་ཡོད་པའི་ཚེ། བདག་ཉིད་ཆེན་པོ་འདི་
དགུང་ལོ་ཉི་ཤུ་རྩ་བདུན་ལོན་པ། ཆུ་མོ་བྱའི་ལོ་ཡིན་ལ།
དེའི་ཚེ་ཕོ་བྲང་ཆེན་པོ་སྣེ་གདོང་དུ་ཛོང་ཇི་རྒྱལ་མཚན་བཟང་པོས་གདན་ས་ཆེན་པོ་དཔལ་ལྡན་ས་སྐྱ་ནས་མཁས་པ་ཆེན་པོ་གཡག་ཕྲུག་སངས་རྒྱས་དཔལ་སྤྱན་དྲངས་ནས་ཆོས་ཀྱི་འཁོར་ལོ་རྒྱ་ཆེན་པོ་སྐོར་བར་ཡོད་དོ༎ ཞེས་བྱ་བའི་གཏམ་གསན་མ་ཐག་ཏུ། རྗེ་བཙུན་ཆེན་པོ་འདི་ཉིད་ཀྱི་སྐུའི་བ་སྤུ་རང་དབང་མེད་པར་གཡོས། ཐུགས་ལ་དགའ་བ་དང་བདེ་བའི་ཉམས་དཔག་ཏུ་མེད་པ་ཤར། ངག་ཏུ་ཨ་ལ་ལ་ཧོ་ཞེས་བྱ་བ་ལ་སོགས་པའི་གསུང་ཉམས་དཔག་ཏུ་མེད་པ་དང་བཅས་ཏེ།
དེ་མ་ཐག་ཏུ་ཞལ་མཇལ་བ་ལ་རིངས་པར་མཛད་ནས་བྱོན་པས། ཡར་ལུང་བྱ་སའི་གཙུག་ལག་ཁང་དུ་ཞལ་མཇལ་ལོ༎
དེའི་ཚེ་སངས་རྒྱས་རྣམས་ལ་ལྷག་པར་བྱས༎ དེ་ལ་དགེ་བའི་རྩ་བ་བསྐྲུན༎ ཅེས་དང། ཡུམ་འདི་གང་གི་རྣ་ལམ་དུ་གྲགས་པར་གྱུར་པ་དེ་སྔོན་གྱི་རྒྱལ་བ་ལ་བྱ་བ་བྱས་པའོ༎ ཅེས་པའི་སྐབས་དང་འགྲིག་པས། དཔོན་སློབ་གཉིས་ཀ་ཐུགས་ཤིན་ཏུ་དགྱེས་ཤིང་སྐུ་སྐྱེ་བ་དཔག་ཏུ་མེད་པའི་བཤེས་གཉེན་ཡིན་