[A:53]ཇི་ལྟར་མངའ་བ་ནི། དེ་ཡང་རྒྱུ་ལམ་གྱི་དབང་གིས་ཐོག་མར་སྨིན་པའི་བཀའ་དྲིན་ཅན་ཐེག་ཆེན་ཆོས་ཀྱི་རྒྱལ་པོ་ནི། ཉམས་མྱོང་ཡེ་ཤེས་ཀྱི་ངོ་ན་རིགས་དྲུག་པ་རྡོ་རྗེ་འཆང་ཉིད་དུ་གསལ་ཞིང་ཐེ་ཚོམ་མི་མངའ་ལ། མ་དག་པ་རྣམ་ཤེས་ཀྱི་ངོ་ན་ཡང་བླ་མ་དེ་མཚན་མོ་མུན་ནག་གི་ནང་ན་བཞུགས་པའི་ཚེ་ཡང། ཞལ་གྱི་དཀྱིལ་འཁོར་ཟླ་བའི་དཀྱིལ་འཁོར་ཉ་གང་བ་ལྟར་གསལ་ཞིང་དངས་པའི་འོད་ཟེར་ཀུན་དུ་འཕྲོ་བ་དང། སྐུའི་ཆ་ཤས་ལྷག་པ་རྣམས་ཀྱང་དངས་ཤིང་ཐོགས་པ་མེད་པ་ཉིད་དུ་མཐོང་གིན་ཡོད་པ་ཡིན་ཞེས་གསུང་ངོ༎
རྗེ་རྒྱལ་རོང་པ་ཆེན་པོ་ནི། དེ་ཡང་ཡོངས་སུ་གྲགས་པའི་མི་རྣམས་ཀྱི་རྣམ་པར་ཐར་པ་ལས་ཤིན་ཏུ་འདས་པར་མངོན་སུམ་དུ་མཐོང་བས། རང་རེའི་ཆོས་དང་སྲིད་ཀྱི་ཡོན་ཏན་གང་མཆིས་པ་ཐམས་ཅད་ཁོང་གི་བཀའ་དྲིན་ཡིན་ཏེ། ་གཞོན་ནུའི་དུས་རང་གི་ཡུལ་ངན་ལ་ཞེན་པས་ལུས་ན། བཙུན་པའི་གཟུགས་ཅན་ཕལ་པ་ཞིག་ལས་མི་འོང་བ་ལ། ཕྱག་ཕྱིར་ནན་གྱིས་ཁྲིད་ཅིང་འབྲངས་པས་བསླབ་སྦྱངས་མཐར་ཕྱིན་མཁས་པའི་གྲགས་པ་ཐོབ་བྱུང། བར་དུ་ཡང་རང་ཡུལ་དུ་འཁོར་ནས་ཉན་བཤད་ཀྱི་གཟུགས་བརྙན་ཞིག་བྱེད་དགོས་བྱུང་པ་དེར་ཆགས་ན། བཟང་ལྡན་པའི་སློབ་དཔོན་གྱི་མིང་བཏགས། མི་ཚེ་ཆགས་སྡང་ལ་སྐྱེལ་དགོས་ཤིག་འོངས་པར་ཡོད་ལ། རྗེ་ཁོང་པ་དབུས་ནས་གདན་སར་ཕེབས་པའི་ཚེ། ནན་གྱིས་ཕྱག་ཕྱིར་ཁྲིད་པས། ་དིང་སང་བྱ་བྲལ་དུ་ཁས་བླངས། ཆགས་སྡང་གི་ལམ་ལས་གྲོལ། མི་ཆེ་རྒུ་ཀུན་གྱིས་བཀུར་སྟི་བྱེད། བསྟན་པ་ལ་ཡང་ཕན་ཐོགས་པར་བྱུང་བས། རང་རེའི་དགེ་ལེགས་ཐམས་ཅད་བླ་མ་ཁོང་གི་ཕྱོགས་སུ་བསྔོ་བ་ཡིན་ཞེས་གསུངས།
རྗེ་ངོར་པ་ཆེན་པོ་ནི། ་གསང་སྔགས་རྡོ་རྗེ་ཐེག་པའི་ཆོས་ཟབ་ཅིང་རྒྱ་ཆེ་བ་ཆེས་ཤིན་ཏུ་མང་པོ་དག། གསང་སྔགས་ཀྱི་ཆོས་ལྟར་བཅོས་པ་གཞན་དང་མ་འདྲེས་ཤིང། ནང་ཚན་སོ་སོའི་ཡང་དམིགས་ཕྱེད་པར་ཐུགས་ལ་བཏགས་པས་ཐ་མར་བཀའ་དྲིན་ཆེ། བླ་མ་འདི་ལ་ནི་མཁས་