[A:405]བླང་བར་བྱ་བ་ཉིད་དུ་རུང་བ་མ་ཡིན་པར། བརྒྱུད་པའི་རིམ་པ་དག་ལས་ལེགས་པར་འོངས་པའི་ཕྱིར་ན། གངས་ཅན་དུ་བྱོན་པའི་གདམས་པ་གཞན་དང་གཞན་ཅི་རིགས་པ་དག་ལས་ཁྱད་པར་དུ་འཕགས་སོ༎
སྙན་བརྒྱུད་བཞི་དང། ཚད་མ་བཞི་པོའི་རྩ་བ་ཡང་བླ་མ་ཚད་མར་གྱུར་པ་ཉིད་མེད་ན་མི་འབྱུང་བས་ན། ཆོས་འདིའི་བཤད་སྒྲུབ་ཀྱི་བརྒྱུད་པ་འཛིན་པ་དག་ཐོག་མར་ཚད་མ་ཉིད་དུ་ཡིད་ཆེས་པར་བྱ་བ་ལ་འགྲུས་པ་མི་ལྷོད་པར་མཛད་དོ༎
དེ་བས་ན་ཕྱི་མའི་དུས་འདིར། ལམ་འབྲས་བུ་དང་བཅས་པའི་མན་ངག་ཉིན་མོའི་དབང་ཕྱུག་ལྟ་བུར་གྱུར་ནས། སྒྲུབ་པ་པོ་སྐར་མའི་ཚོགས་ཙམ་གསལ་བར་བསྐྲུན་པ་ནི། ཁྱབ་བདག་རྡོ་རྗེ་སེམས་དཔའི་ངོ་བོར་བཞུགས་པ། མཚན་བརྗོད་པར་དཀའ་བའི་རྗེ་བཙུན་དམ་པ་ཨཱནནྡ་བྷ་ཏྲའི་ཞལ་སྔ་ནས་ཡིན་ལ། རྗེ་དེ་ཉིད་ཀྱི་སྲས་ཀྱི་ཐུ་བོ་དམ་པར་གྱུར་ནས། སྒྲུབ་རྒྱུད་ཆུ་བོའི་རྒྱུན་ཇི་བཞིན་པ་དེས། བསྐལ་བཟང་སློབ་མའི་ཚོགས་བགྲང་བ་ལས་འདས་པ་དག། རིག་པ་འཛིན་པའི་རྒྱ་མཚོ་ཆེན་པོར་རོ་གཅིག་པ་ཉིད་དུཉིདུ་མཛད་པ་པོ་ནི། རྒྱལ་སྲས་སེམས་དཔའ་ཆེན་པོ་དཀོན་མཆོག་རྒྱལ་མཚན་ཞེས། མཚན་ཉི་མ་ལྟར་གྲགས་པ་དེ་ཡིན་ནོ༎
རྗེ་བླ་མ་དམ་པ་སྲས་དང་བཅས་པ་དེ་གཉིས་ཀའི་ཞབས་ཀྱི་རྡུལ་ཕྲེང། རྙོག་པ་མེད་པ་སྤྱི་བོས་གུས་པར་བླངས་ནས། གདམས་པ་འདིའི་ལུགས་ཀྱི་རྩ་བའི་བཀའ་དང། བསྟན་བཅོས་ཀྱི་གཞུང་དང། མན་ངག་གི་འཁྲིད་ཚུལ་ཆ་ལག་དང་བཅས་པ་རབ་ཏུ་གྱུར་པ་གསན་ནས། དུས་ཡུན་