[A:135]མཛད་དེ། དཔེར་ན་ངེད་ཀྱི་ཨ་ཇོ་གློ་བོ་དཔོན་དྲུང་རྣམ་སྲས་པར་གྲགས་པས། པཎ་ཆེན་དང་མཇལ་བའི་སྐབས། གློ་བོ་ནང་གི་ཞིབ་དཔྱོད་དྲིས་མལ་གནང་དུས། བཀའ་ལས། ཆོས་རྗེ་བྱམས་པ་གླིང་པ་དཔལ་ལྡན་ཚུལ་ཁྲིམས་པ་དེས། ངེད་རང་གི་མདུན་དུ་གྲངས་ཆེན་བཅོ་བརྒྱད་ཀྱི་གཞུང་ཚིག་འབྲུ་སྣ་གཅིག་ལ་ཡང་ལྷག་ཆད་མེད་པར་སྤྱི་ཊཱིཀ་རང་རེའི་ངག་ལས་རྫོགས་ཤིང། ཚིག་གཅིག་ལ་ཡང་ཟུར་མ་ཉམས་པར་བཤར་སྦྱང་བྱས། ད་ལྟར་རབ་འབྱམས་པ་གྲགས་པ་ཅན་མང་དག་འདི་ཚོ་ན་ཡོད་ཀྱང་འགྲན་དཔེ་མེད། སྔགས་ཀྱི་ནི་ཐ་ན་བྲིས་ཐིག་ཚུན་སྔར་ནས་ཤེས་ཚར་བའི་བྱང་ཆུབ་པར་འདུག་པས། རང་རེའི་དུས་འཁོར་དབང་མོ་ཆེའི་རྡུལ་ཚོན་ཡང་ཁོང་གིས་བཞེངས། དེ་དུས་ལག་པ་གཉིས་ཀས་ས་ཚོན་འབྲི་བ། སྨན་ཐང་ནང་པ་དོན་གྲུབ་པས་གཟིགས་པ་འདི་འདྲའི་གདོད་བྱས་ན། ངེད་ཀྱི་པིར་གྱིས་འབྲི་བ་བརྫུན་གསོབ་ཏུ་སྣང། ངེད་ལ་དངོས་སུ་ཟེར་བ་ན་ཡང། མཚན་ཉིད་པ་སྐད་འདི་ཆགས་སྔར་སྤུན་འཚག་ཆེ་བར་སྣང་བས། ཁོང་གིས་བསླབས་ཤེས་ཡོ་ངེས་རྫོགས་སྐད་སྒྲོག་པ་སྣང་ངོ༎
སྒྲ་སྙན་ངག་སྡེབ་སྦྱོར་རྣམས་ཀྱང་ངེད་རང་གི་ལག་ཚར་ཡིན། ཕྱིས་སློབ་དཔོན་མི་ཉག་པས་ཁོང་ལ་རང་རེའི་ལག་ན་ཡོད་པའི་སྒྲ་ཊཱིཀ་ཆེན་མོའི་སྟེང་ནས་ས་རིས་གཏོང་བ་སྐད་ཀྱིས་གྲགས་ཀྱང། དེ་སུས་སུ་ལ་སློབ་པ་ཡིན་མ་ངེས། རྩིས་ཀྱང་མཐར་ཕྱིན་པ་ལོབས་འདུག། མངའ་རིས་སུ་མཁས་པ་རྩིས་ཕྲུག་བྱ་བའི་ཕ་ལས་བསླབས་ཟེར། ལྷ་རིས་ཀྱང་རྒྱབ་ཏུ་རྩོལ་མེད་དུ་འབྲི་ཤེས་པའི་གྲགས་པ་ཐོས། ཁོང་འདིའི་སློབ་གཉེར་རྫོགས་པ་ནས་བྱམས་གླིན་དབུ་ཆེ་བའི་གྲོས་བཏོན་ཡིན། ངོར་ཚོར་ལོ་གསུམ་ཙམ་འགྲོ་དགོས་པར་སྣང། ངེད་ལ་ཞུར་བྱུང་བས་དེ་ཁ་ལེགས་ཁྱེད་རང་གིས་མ་ཤེས་པ་ནི་བསླབ་རྒྱུ་མེད། མ་ཐོབ་པའི་དབང་ལུང་འདྲ་ཡོད་བྱས་ཕྱིས་དེ་ཀ་བྱུང་འདུག།