[A:156]དང་དད་མོས་རྩེ་གཅིག་པས་བསྒྲུབས་ཤིང། བཀྲ་ཤིས་བརྩེགས་པའི་གཟིམས་ཁང་རྩེ་དེ་ཉིད་དང། གྲྭ་ཁང་ཡང་ཕལ་ཆེར་ཐེབས། གྲྭ་པའི་ཚོགས་ཀུན་ཀྱང་ཉིན་པར་སྒོ་གསུམ་དགེ་བས་འཁོལ་བའི་གཡེང་བ་དེས་བྲེལ་བའི་ངང་ཉིད་ལས། སླར་ཆོས་བརྗོད་རིགས་ལུང་སྟོང་ཆོས་སོགས་གང་ལ་ཡང་ཐོ་མི་ཕོག་པའི་བློ་བསྐྱེད་སོགས་ལྷག་པར་ཆེ་བ་ལ་བསམས་ན། སངས་རྒྱས་མཆོག་གི་མཛད་པའི་འཕྲུལ། སྤྲུལ་པ་མང་པོ་བྱེ་བ་ཕྲག་བརྒྱའི་ཚུལ་ཉིད་དུ་གྱུར་པའི་དབང་དང། གཙུག་ལག་ཁང་གི་ལྕམ་ཤིང་སོགས་ཀྱང། མི་མ་ཡིན་པའི་འགྲོ་བ་དྲེགས་ལྡན་མཐའ་དག་གིས་གུས་པས་བསྟབས་པའི་རྣམ་འཕྲུལ་བསམ་གྱིས་མི་ཁྱབ་པ་དང། ཀ་གདུང་སོགས་མི་བརྒྱར་ལོངས་ཀྱིས་བསྐུལ་བསྐྱོད་དཀའ་བ་དག་ཀྱང། ཨར་ལས་པ་མི་ཉི་ཤུ་ཙམ་གྱིས་བདེ་བར་ཕྲག་པའི་ཁར་ལེན་ནུས་ཤིང། ངལ་བ་དང་ཆད་པ་སྐད་ཅིག་མེད་ཅིང་ལེགས་པར་འདྲོངས་པ་སོགས། བསམ་ཤིང་ཡིད་ལ་ངོ་མཚར་བའི་དད་པའི་མཆོག་ལྷག་པར་སྐྱེ་བ་ཉིད་ཡིན་པར་གོར་མ་ཆག་གོ།
དེར་ལུག་ལོ་vc: 1487ལ་བྱམས་པའི་སྐུ་དང། གཙུག་ལག་ཁང་གི་ཁྱོན་ཆེ་ལོང་ལེགས་པར་གྲུབ་པའི་རབ་གནས་དགེས་པ་རྡོ་རྗེའི་རྡུལ་ཚོན་གྱི་དཀྱིལ་འཁོར་ལེགས་པར་བཞེངས་ནས། དགེ་སློང་རྡོ་རྗེ་འཛིན་པའི་ཞབས་འབྲིང་བའི་ཚོགས་དང་བཅས་པས་བཀྲ་ཤིས་མངའ་གསོལ་བརྟན་བཞུགས་ཞལ་བསྲོའི་བར་གྱི་ཆོ་གའི་ལེགས་བྱས་ཡང་དག་ཕུན་ཚོགས་སྩལ། དེའི་སྔ་སོར་སྡེ་པ་གཙང་ཆེན་དྲུང་དང། ཧོར་ཤཱཀྱ་པ་སོགས་ཀྱིས་དབང་ཡོན་དུ་ཕུལ་བའི་ཆུ་དབར་ཆོས་རྫོང། བདག་ཆེན་རིན་པོ་ཆེ་ཆུ་མིག་པ་བློ་གྲོས་དབང་ཕྱུག་པས་སྩལ་བའི་ཆོས་གཞིས། སླར་ཡང་དབང་ལྡན་ཆོས་འཁོར་སོགས་ཉང་སྟོད་སྐོར་ནས་ཀྱང་བོད་འབྲོག་གི་ཆོས་གཞིས་གསར་དུ་བྱུང་བ་ཀུན་ལ་གཞི་གནང། གཙོ་བོར་སྟོད་མངའ་རིས། སྨད་མདོ་