[A:231]གོ་རིམ་ལྟར་བྲིས་པ་འདི་ཡོངས་སུ་རྫོགས་པར་གྲུབ་པའོ༎ ་༎
པཎ་ཆེན་ཉིན་བྱེད་དགའ་ལྡན་ནུབ་རིའི་རྩེར༎
དགོངས་པ་བསྐྱོད་པོ་སྲིན་བུ་མེ་ཁྱེར་བདག༎
མ་ལས་བཙས་པས་སྐལ་མེད་བདག་གི་མིག་
ཁྱེད་སྐུ་མཐོང་བའི་ཡུལ་དུ་མ་གྱུར་གྲང༎
དད་པའི་སློང་མོས་ཐོས་ལྡན་ཕྱུག་པོའི་སྒོར༎
ལོ་རྒྱུས་ཟས་ཀྱི་རྙེད་པ་བསླངས་པའི་ཆ༎
རྣ་བའི་སྣོད་དུ་ཅུང་ཟད་ཆགས་པ་དག།
གདུང་ཤུགས་བཀྲེས་པའི་ཉམས་ཀྱིས་གཅེས་པར་བཟུང༎
གྲོག་མཁར་སྦྲང་རྩི་དཔེ་བཞིན་ཕྲ་བའི་དངོས༎
རྡུལ་ཕྲན་མ་འདྲེས་བསགས་པའི་ཚིག་སྦྱོར་འདི༎
ཆ་ཤས་ཡོངས་སུ་གང་བའི་ཟླ་བ་སྟེ༎
རྣམ་ཐར་ཡོངས་ཀྱི་ཚིག་དོན་ཀུ་མུཏ་ཕྱེ༎
ཤིན་ཏུ་བློ་དམན་ཉམས་ཆུང་བུང་བའི་རྩལ༎
རྣམ་དཔྱོད་གཤོག་སྒྲོག་བསྐྱོད་པའི་སྟོབས་ཞན་ཡང༎
རྣམ་ཐར་པད་ཚལ་རྒྱུ་བའི་རྐང་དྲུག་བདག།
ལོ་རྒྱུས་སྦྲང་རྩིའི་བཅུད་ཀྱིས་ལྷག་པར་ཚིམ༎
གང་ཡང་རང་གི་བླ་མའི་རྣམ་ཐར་རང་རང་མོས་དད་འདྲེན་བྱེད་གང༎
གང་ཡང་མཛད་པའི་ལེགས་བྱས་རྒྱ་ཆེན་རྒྱ་མཚོའི་ནོར་བུ་ནོར་མཆོག་གང༎
གང་ཡང་བརྗོད་པས་ཟད་པར་མི་ནུས་མི་ཟད་གཏེར་གྱི་བུམ་བཟང་གང༎
གང་ཡང་བསྔགས་འོས་ཡོན་ཏན་རྒྱན་ཕྲེང་སྙན་ཚིག་ཕྲེང་དུ་དངར་བ་གང༎
འདི་ལྟར་དམ་པའི་མཛད་པའི་ཆ༎
ལེགས་བརྗོད་བསོད་ནམས་གཟུགས་མཆིས་ན༎
ལྷུན་པོའི་སྤོ་ལས་ཡོངས་རྒལ་ཏེ༎
གླིང་བཞིའི་ཁྱོན་དུ་ཚུད་པ་མིན༎
ཕལ་ཚིག་དཀྱུས་སུ་བྲིས་པ་དག།
བློ་དམན་སྐྱེ་བོས་གོ་ཆེད་དེ༎
མ་བསྡམས་བླུན་ངོར་བརྗོད་པ་ན༎
སྨྲ་པོ་རང་ཉིད་ཕྱུགས་དང་མཚུངས༎
སྙན་ངག་སྡེབས་ལེགས་མངོན་བརྗོད་ལང་ཚོ་མ༎
རིག་གནས་མཁྱེན་པའི་ཡིད་ཀྱི་འདོད་འཇོ་བ༎
རྣར་སྙན་བརྗོད་ཚིག་རབ་གཙང་དག་པའི་ངག༎
མཁས་མང་ཡིད་ཀྱི་ཤིང་རྟ་འདྲེན་བྱེད་ཡིན༎
ཚིག་གྲོགས་མ་ཉམས་དོན་བཟང་