[A:53]སྦས་པ་མིག་འབྱེད། ཤ་ཝ་རའི་རྡོ་རྗེའི་གཞུང་ཆུང། གྲུབ་ཆེན་ཡུ་མོའི་གསལ་སྒྲོན་རྣམ་བཞི། རྡོ་རྗེ་ཞུང་ཆུང་གི་འགྲེལ་པ་ཐོག་མཐའ་བར་དགེ་རྣམས་ཀུན་སྤང་ཀུན་ཏུ་བཟང་པོས་མཛད་པ་དང། བུ་སྟོན། ཆོས་རྗེ་བླ་མ། ཇོ་ནང་ཕྱོག་ལས་རྣམ་རྒྱལ་བ་རྣམས་ཀྱི་ཁྲིད་ཡིག་སོ་སོ་ངོ་སྤྲོད་རྣམས་དང་བཅས་པ་ཐོབ་ཅིང། ངེད་རང་ལ་སྒོས་སུ་ཤ་ཝ་རས་དམརསྨར་སྟོན་ཤཱཀྱ་ལ་དངོས་སུ་གནང་བ། དེས་གྲུབ་ཆེན་བསོད་ནམས་སེང་གེ་པ་ལ། དེས་སྤྱང་ལུང་རིན་པོ་ཆེ་ཉིད་ལ་གནང་བའི་དུས་ཞབས་སྙན་བརྒྱུད་ཀྱི། རབ་ཀྱིས་དང་པོར་རྒྱུད་ལས་རྟོགས། ཞེས་པའི་དོན། ཟབ་ཁྲིད་ཉེ་བརྒྱུད་ཀྱི་གདམས་པ་ཡང་གཅིག་བརྒྱུད་དུ་སྩལ་ཞེས་དྲིན་ཅན་སྤྱང་ལུང་རིན་པོ་ཆེས་པཎ་ཆེན་ཉིད་ལ་སྦྱོར་དྲུག་གསན་དུས་བཀའ་གནང་བའོ༎
དེ་མཚམས་ནཱ་ལེནྡྲར་ཕེབས། རོང་སྟོན་ཆེན་པོའི་དྲུང་དུ་གྲུབ་པའི་རྒྱལ་མོའི་ཚེ་སྒྲུབ་ཞག་བདུན་མའི་ཁྲིད་གསན། འདི་ནི་རོང་སྟོན་ཆེན་པོ་ལ་ཆོས་གསན་པའི་རྗེས་མཐའ་ཡིན་གསུང་ཞིང། དེ་སྐབས་དངོས་ཀྱི་བཀའ་ལུང་ལ། ང་ནི་ཁམས་པ་ཕོབ་ཕོབ་འདི་འདྲ་བྱས་སྡོད་མི་ཁོམ། བྱམས་མགོན་དྲུང་དུ་ལྷ་བུ་དཀར་སིང་ངེ་བ་ཅིག་བྱེད་པ་ཡིན་གསུང་ཞེས་ཀྱང་དྲུང་ཡིག་ཆོས་རྒྱན་ལས་བརྒྱུད་པའི་ངག་སྒྲོས་སྨན་ཁབ་མཁན་ཆེན་ལས་ཐོས་སོ༎
དེར་དགུན་སྟོད་ཀམ་དགོན་དུ་ཆོས་རྗེ་བློ་གྲོས་ཆོས་སྐྱོང་བ་ལས་སྦྱོང་རྒྱུད། གཞན་ཕན་སྐོར་གསུམ་གྱི་བཤད་པ་གསན་ནས་གྲོལ་མཚམས་ཟླ་བ་བཅུ་གཉིས་པའི་ཡར་ངོའི་གྲལ་ཚེས་བཅུ་བཞིའི་ཐོ་རངས་རོང་སྟོན་ཆེན་པོ་དགའ་ལྡན་ལ་ཐེགས། སྤྱི་འགྲོར་ཞག་འགའ་གསངས་ཀྱང་པཎ་ཆེན་རིན་པོ་ཆེ་ལ་བཅོ་ལྔའི་ཉི་ཤར་ལ་བང་ཆེན་བྱུང་ནས། ནཱ་ལེནྡྲར་ཕེབས། དེར་ཆོས་རྗེ་དོན་ཡོད་དཔལ་ཀྱང་དེ་ཀ་ན་བཞུགས་འདུག་ཅིང། ངེད་གཙང་ཕྱོགས་ལ་འགྲོ་བའི་རྒྱུ་མཚན་ཕུལ་བས། ཟླ་འཕྲོ་འདི་ཁར་