[A:58]ཁྲིད། རྒྱུད་བཤད། རྭ་པོད་ཡོངས་སུ་རྫོགས་པའི་ལུང། ལྷག་པར་ས་དགེ་སོ་སོའི་འཇིགས་བྱེད་ཀྱི་དགག་སྒྲུབ་མཐའ་གཅོད་ཞིབ་མོ་རང་དང། སྒྲོལ་མ་བླ་མེད། འཁོར་ཆེན། གསང་འདུས་མི་བསྐྱོད་པའི་དབང་བཀའ་རྙིང་མ། འཇམ་རྡོར་ལོ་ཆེན་རིན་བཟང་ནས་བརྒྱུད་པའི་སྟོད་ལུགས་ཀྱི་དབང་རྣམས་ཞུས། གསང་སྟོན་མུས་ཆེན་དྲུང་དུ་གཤེད་དམར་ལྷ་ལྔའི་དབང། སྤྲོས་མེད་ཁྲིད་སྐོར། དྲིལ་བུ་ལུས་དཀྱིལ། དྲིལ་བུ་རིམ་ལྔ། བདེ་མཆོག་དཀར་པོའི་བྱིན་རླབས་ཁྲིད་བཅས། དེ་དག་སོ་སོའི་ཡིག་ལུང། འགོས་ཀྱི་གསང་འདུས་སྟོང་ཐུན། རང་རེས་ཆེད་གཉེར་གསོལ་བ་བཏབ་ནས་གཡག་ཊཱིཀ་རིན་ཆེན་བང་མཛོད་ཀྱི་ལུང་ཡང་ཐོབ་གསུང།
དེར་བཀའ་ཆོས་དེ་རྣམས་གྲོལ་རྗེས། རྗེ་རྡོ་རྗེ་འཆང་གིས། སྲད། སེང་གེ་རྩེ། དཔལ་ལྡན་ས་སྐྱའི་བར་དུ། བླ་མ་སྡེ་དཔོན་སོ་སོ་ལ་འབུལ་སྡུད་ཀྱི་བཀའ་ཤོག་འཐེམས་པ་སྩལ་ཞིང། ད་དྲུང་ནས་སློབ་དཔོན་པ་རྣམས་སྔོན་ལ་བྱོན། ངེད་ཀྱང་གློ་བོ་ནས་འབོད་མི་འདུག་པས། རྗེས་ལ་སླེབ་ཡོང་བས་ངེད་གང་འདུག་ཏུ་བྱོན་མཛོད༎ ཅེས་པའི་བཀའ་ལུང་བཞིན་སྔོན་ལ་ཕྱིན། དེ་རྗེས་ཕྱག་དམ་ལ་བརྟེན་འབུལ་སྡུད་ཀྱང་དཔེ་བྲལ་བྱུང་ཞིང། ཟླ་གཅིག་ཙམ་སོང་དུས་ཆུ་འདུས་ཚོར། རྗེ་དཔོན་སློབ་རྣམས་ཕེབས་ཟེར་བ་ཐོས་ནས། ཞབས་དྲུང་དུ་བསྙགས། དེར་ཟླ་བ་ཕྱེད་ཙམ་གདན་ཆགས་ཤིང། དེ་རིང་ཚོགས་ལ་ཞེན་པ་གཞི་བྲལ་གྱི་ཁྲིད་གསུང་བ། ངེད་ཤར་ཕྱོགས་ནས་ཡོངས་པའི་དཔོན་སློབ་ཀུན་གྱིས་ཞུས་ཤིང། དེར་རྗེའི་ཕྱག་ཕྱིར་བྱོན་འདུག་པས། ཁྭ་ཆར་བྱང་ཆུབ་སེམས་དཔའི་དྲུང་དུ། གཟུངས་ཆེན་གྲྭ་ལྔ་དང། གཙུག་ཏོར་གདུགས་དཀར་ཅན། ལྷ་མངས་གཉིས་ཀའི་དབང་དང། ལྷ་མོ་འོད་ཟེར་ཅན་ལྷ་ལྔའི་དབང། འཇམ་དབྱངས་ཤེས་རབ་རྒྱ་མཚོའི་དྲུང་དུ་སེང་གེ་སྒྲ་རྗེ་བཙུན་