[A:204]རིན་ཆེན་ལའོ། །དེའི་སྒྲུབ་ཐབས་དང་རྗེས་གནང་བྱ་ཚུལ་རྗེ་ཉིད་ཀྱིས་མཛད་པའི་མ་ནོར་རབ་གསལ་སྒྲོན་མ་ཞེས་བྱ་བའི་ལུང་དང་བཅས་པ་ཐོས། །༈། །གསུམ་པ་དེ་བཞིན་གཤེགས་པའི་རིགས་ཀྱི་ཡུམ་ལ་ཐུགས་སྲས་ལོ་ཙཱ་བ་རིན་ཆེན་རྣམ་རྒྱལ་གྱིས་མཛད་པའི་དཀྱིལ་ཆོག་བདེ་དགའ་རྒྱ་མཚོ་དང༌། བཅོ་བརྒྱད་འཇམ་དབྱངས་ཆོས་རྗེས་མཛད་པའི་དཀྱིལ་ཆོག་གི་སྟེང་ནས་དེ་བཞིན་གཤེགས་པའི་རིགས་ཀྱི་ཡུམ་དུ་གཏོགས་པ་བཅོམ་ལྡན་འདས་མ་བསྲུང་བ་ལྔ་ལྷ་ལྔ་བཅུ་རྩ་གཅིག་གི་རས་བྲིས་ཀྱི་དཀྱིལ་འཁོར་དུ་དབང་ལེགས་པར་ཐོབ་པའི་བརྒྱུད་པ་ནི། ཡང་དག་པར་རྫོགས་པའི་སངས་རྒྱས། དཔལ་ཕྱག་ན་རྡོ་རྗེ། གྲུབ་ཆེན་ཛེ་ཏཱ་རི་དགྲ་ལས་རྣམ་རྒྱལ། རྡོ་རྗེ་གདན་པ་མྱ་ངན་མེད་པའི་དཔལ། པཎྜི་ཏ་དོན་ཡོད་རྡོ་རྗེ། བ་རི་ལོ་ཙཱ་བ། རྗེ་བཙུན་བརྩེ་བ་ཆེན་པོ། སློབ་དཔོན་རིན་པོ་ཆེ། རྗེ་བཙུན་གྲགས་པ་རྒྱལ་མཚན། འཇམ་དབྱངས་ས་སྐྱ་པཎྜི་ཏ། ཆོས་ཀྱི་རྒྱལ་པོ་འཕགས་པ་བློ་གྲོས་རྒྱལ་མཚན། དགའ་ལྡན་པ་བཀྲ་ཤིས་དཔལ། བླ་མ་དཔལ་ལྡན་སེང་གེ བུ་སྟོན་རིན་ཆེན་གྲུབ། ཐུགས་སྲས་སེམས་དཔའ་ཆེན་པོ་རིན་ཆེན་རྣམ་རྒྱལ། སྐུ་ཞང་ནམ་མཁའ་མཆོག་གྲུབ། ཀ་བཞི་པ་རིན་ཆེན་རྒྱལ་མཚན། མཁྱེན་རབ་རིན་ཆེན་མཆོག་གྲུབ། ཀུན་མཁྱེན་ཤཱཀྱ་དོན་གྲུབ། དེ་དབོན་ཀུན་དགའ་ལེགས་གྲུབ། ཤེའུ་ལོ་ཙཱ་བ་བྱམས་པ་ཀུན་དགའ་ཆོས་གྲགས། བྱམས་པ་ངག་དབང་མཆོག་ལེགས་རྡོ་རྗེ། མཁྱེན་རབ་བསྟན་འཛིན་བཟང་པོ། བྱམས་པ་ངག་དབང་ལྷུན་གྲུབ། མཁྱེན་རབ་ཀྱི་དབང་ཕྱུག་ངག་དབང་ཀུན་དགའ་ལྷུན་གྲུབ། དེས་བདག་ཚུལ་ཁྲིམས་རིན་ཆེན་ལ་