[A:498]གཞུང་རྣམས་ཐོས་པའི་རྣམ་གྲངས་ལ། ས་ངོར་ནས་བརྒྱུད་པ་དང་འོག་ནས་འབྱུང་བ་གཉིས་ཕལ་ཆེར་ཟློས་ཏེ་འབྱུང་ཡང་དཔེ་རྒྱུན་གྱི་སྒྲིག་རིམ་མི་འདྲ་བ་དང༌། བླ་མ་ཕྱི་མས་མཛད་པའི་ཁ་འགེངས་མང་ཉུང་ལ་སོགས་པ་ཁྱད་པར་མཆིས་པ་རྣམས་སོ་སོར་མ་བཀོད་ན། རྗེས་འཇུག་པ་དག་བརྒྱུད་ཚུལ་ཐ་དད་པའི་ཁུངས་ཞིབ་པར་དཔྱོད་མི་ནུས་པ་སོགས་ཀྱིས་རྟོགས་དཀའ་བ་མཆིས་པར་བརྟེན། ལུང་རྒྱུན་རྒྱས་བསྡུས་གཅིག་གོ་གཅིག་ཆོད་དུ་གྱུར་ན་ཤིན་ཏུ་མི་བཏུབ་པར་སྙམ་ནས། ཐོག་མར་ངོར་ནས་བརྒྱུད་པ་ལྟར་འགོད་པ་ལ། རྟོག་བདུན་ཐུགས་རྗེ་ཆེན་པོ་དང་རྭ་ལོའི་འགྱུར། ཡང་རྟོག་བདུན་མལ་ལོས་བསྒྱུར་བ་ལ་ས་སྐྱ་པས་གསན་པའི་ལུགས་མཆན་འབྱར་བ། རྟོག་བདུན་གྱི་དཀའ་འགྲེལ་ཆོས་ཀྱི་ཤེས་རབ་ཀྱི་འགྱུར། རྟོག་པ་གསུམ་པ་མཆན་འབྱར་བ། སློབ་དཔོན་ཤྲཱི་བྷ་དྲས་མཛད་པའི་སྒྲུབ་ཐབས། ཕྱག་གཉིས་པའི་སྒྲུབ་ཐབས་འཇམ་པའི་དབྱངས་ཀྱིས་མཛད་པ་རྭ་འགྱུར། ཨ་མོ་གྷས་མཛད་པའི་སྒྲུབ་ཐབས། བསྟོད་པ། དབང་ཆོག སྦྱིན་སྲེག ཞི་བ་ལས་བདུན་དང་དྲག་པོ་ལས་བདུན་ཨ་མོ་གྷ་ཆུང་བས་མཛད་པར་གྲགས་པ། གཏམ་རྒྱུད་ཀྱི་རྟོག་པ་མཛད་བྱང་མེད་པ། གཏོར་ཆོག་དང་ཨུཥྞཱི་ཥའི་སྲུང་འཁོར་བྷ་རོས་མཛད་པ། ཚོགས་འཁོར་ཤཱནྟི་པས་མཛད་པ་རྣམས་རྭ་འགྱུར། ཙྪུན་དྷ་རའི་སྒྲུབ་ཐབས་དང༌། རྟོག་པ་ཞི་བ་མོ་རྭ་འགྱུར། ཡ་མ་རཱ་ཛའི་རྩ་སྔགས་ལོ་ཙཱ་བ་རྡོ་རྗེ་དཔལ་གྱི་འགྱུར། མ་མོ་བརྒྱད་བསྐོར་གྱི་སྒྲུབ་ཐབས་འཇམ་དཔལ་ཡེ་ཤེས་ཀྱིས་མཛད་པ། ལྷ་མོ་བརྒྱད་བསྐོར་གྱི་སྒྲུབ་ཐབས་ཞི་བ་ཡེ་ཤེས་ཀྱིས་མཛད་པ། དེས་མཛད་པའི་འཁོར་ལོ་བསྐོར་བའི་ལས་