[A:81]སྐུ་དབོན་མཐུ་སྟོབས་དབང་ཕྱུག་ཀུན་དགའ་བསོད་ནམས་པ་ཟུང་གིས་ཕེབས་ཤིང་གདན་སར་མཛད་དེ་ཆོས་སྲིད་ཟུང་འབྲེལ་གྱི་ཕྲིན་ལས་གསེར་གྱི་འཁོར་ལོས་མདོ་ཁམས་ཀྱི་ལྗོངས་ཆེན་པོར་དབང་སྒྱུར་བར་མཛད་པའི་སའི་ཐིག་ལེ་དེ་ཉིད་དུ། མཁར་དཀར་དམར་ཞེས་པའི་བླ་བྲང་ཁག་གཉིས་བྱུང་བའི་མཁར་དམར་པོའི་བདག་པོ་དྲུང་པ་ཀུན་དགའ་རྒྱ་མཚོ་ཞེས་པ་སྐར་ནག་རྩིས་དང་གསོ་བ་རིག་པའི་གཞུང་ལུགས་ལ་ཤིན་ཏུ་མཁས་ཤིང༌། དཔལ་ས་སྐྱ་པ་སྔགས་འཆང་ངག་དབང་ཀུན་དགའ་བཀྲ་ཤིས་གྲགས་པའི་རྒྱལ་མཚན་དཔལ་བཟང་པོ་དང༌། མཁན་ཆེན་འཇམ་པའི་དབྱངས་སངས་རྒྱས་ཕུན་ཚོགས་པ་དང༌། མཁན་ཆེན་རྡོ་རྗེ་འཆང་ཤེས་བྱ་བཟང་པོ་ལ་སོགས་པ་ལས་སྡོམ་པ་གསུམ་གྱི་བཀའ་ལུང་ཟབ་ཅིང་རྒྱ་ཆེ་བ་ཐོབ་ཅིང༌། དེ་དག་གི་བསླབ་བྱ་རྣམས་ལ་གཅེས་སྤྲས་སུ་མཛད་པ་དེ་ཉིད་ཀྱི་དྲུང་དུ་སྐྲ་ཕུད་ཕུལ་བས། ཚངས་པར་སྤྱོད་པའི་དགེ་བསྙེན་གྱི་སྡོམ་པ་ཕོག་སྟེ། ཀུན་དགའ་བསོད་ནམས་ཞེས་མིང་དུ་གདགས་པ་བཅས་ཐོབ་པའི་བརྒྱུད་པ་ནི། འོག་ཏུ་ཚིགས་གསུམ་རིམ་ནོས་ཀྱི་བསྟན་པ་ལ་རིམ་གྱིས་སློབ་པའི་སྐབས་སུ་དགེ་བསྙེན་གྱི་སྡོམ་པ་ཡང་བསྐྱར་དུ་ཐོབ་པའི་བརྒྱུད་པར་བསྡོམས་པ་ལས་འདིར་ཟུར་པ་མ་དགོས་སོ། །གཉིས་པ་སྡོམ་པར་གནས་པས་ཐོས་བསམ་ཇི་ལྟར་བྱས་པའི་བརྒྱུད་རིམ་ལ་གཉིས་ཏེ། ཐུན་མོང་བ་ཕྱི་རིག་པའི་གནས་ཐོས་པའི་བརྒྱུད་རིམ་དང༌། ཐུན་མོང་མ་ཡིན་པ་ནང་རིག་པའི་གནས་ཐོས་པའི་བརྒྱུད་རིམ་གཉིས། དང་པོ་ནི། ཐེག་པ་ཆེན་པོ་མདོ་སྡེ་རྒྱན་ལས། རིག་པའི་གནས་ལྔ་དག་ལ་བརྩོན་པར་མ་བྱས་ན། །འཕགས་