[A:29]dgongs nas/ rnal 'byor bla na med pa'ang rnal 'byor gyi rgyud du bsdus pa yin gyi/ rnal 'byor bla na med pa ni dbang dang lam la sogs pas khyad par du gyur pas logs su byed pa nyid do/ /rtog pa'i rgyud ni dngos grub phra mo ston pa tsam la dgongs nas logs su byas pa yin gyi/ phyi'i bya ba ston pa dang dman pa 'dzin pas bya ba'i rgyud du 'du ba yin no/ /gsang ba'i mtha' zhes bya ba ni rnal 'byor ma'i rgyud logs su smos pa'ang rgyud de nyid kyi khyad par ston pa tsam la dgongs kyi/ don gsang ba'i ye shes bla na med pa las logs su gyur pa ma yin pas so/ /des na don la rgyud sde bzhir nges pa'i 'jog byed ni drug ste/ dang po phyi rol pa'i chos su smra ba bzhi rjes su gzung ba'i phyir rgyud sde bzhir nges pa ni/ 'dod chags can lha chen po'i rjes su 'brangs nas 'dod chags chos su smra ba dang / zhe sdang can khyab 'jug gi rjes su 'brangs nas 'tshe ba chos su smra ba dang / gti mug can tshangs pa'i rjes su 'brangs nas gtsang sbra chos su smra ba dang / gsum ga la mos pas gsum ga chos su smra ba ste bzhi yod pa de dag rjes su gzung ba'i phyir te/ rim par ji skad du/ dpal gsang ba 'dus pa las/ chags can ye shes 'dod pa yis/ /rtag tu 'dod yon rnam lnga bsten/ /zhes dang / mngon byang las/ e ma'o gsod pa 'di ni bzang / /bsad pa gsod pa ma yin te/ /zhes sogs dang / legs par grub pa las/ khrus byas gtsang zhing gzung bya ste/ /bkra shis ngo mtshar dag byas nas/ /zhes dang / de kho na nyid