[A:38]ltar zla ba shar gyur pa/ /tshad med pa yi gzugs brnyan rnams/ /chu yi snod du snang gyur kyang / /zla ba gnyis su 'gyur ba med/ /de bzhin chags med mkhyen ldan rnams/ /chags med rnam par 'tshang rgya bas/ /zhing rnams kun du rab tu snang / /sangs rgyas la ni gnyis snang med/ /'di las gcig kyang yod ma yin/ /sku ni gnyis sam gsum du med/ /ji ltar sems can bsam pa bzhin/ /tshad med par ni rab tu snang / /zhes dang / rje btsun byams pa mgon pos/ de bzhin gshegs pa chos sku la/ /bskyod pa med par khams kun tu/ /skal ldan rnams la 'bad med par/ /sprul pa dag ni ston par mdzad/ /ces gsungs pa ltar/ ston pa mchog nyid 'og min gyi gnas sam chos sku zab cing zhi ba'i ngang las nam yang bskyod pa med par/ dper na zla ba'i dkyil 'khor gcig las chu snod che phra ji snyed kyi grangs dang mnyam par de snyed kyi gzugs brnyan ston pa la 'bad rtsol med pa de bzhin du/ 'jig rten gyi khams mu med pa rnams su de bzhin gshegs pa'i sngon gyi smon lam dang / phrin las kyi rgya mtsho las mngon par sprul pa'i sgyu 'phrul rol pa de bzhin gshegs pa'i gzugs dang / rgyal sras byang chub sems dpa'i rnam pa dang / 'phags pa nyan thos ya brgyad kyi rnam pa dang / 'khor los sgyur ba'i rnam pa dang / mkhas pa paNDi ta'i rnam pa dang / grub pa'i sa la gnas pa'i rnam pa dang / khams kyi rgyal phran gyi rnam pa la sogs pa/ mdor na 'phags pa dang so so skye bos bsdus pa'i mkhas pa/ chos thams cad la chos kyi mig dri ma dang