[A:62]/ ces gsungs pas so/ /lhag par rgyal ba'i gdung 'tshob byang chub sems dpa' rnams sems can gnas skabs 'khor ba'i sdug bsngal gyis nyen pa rnams gang la gang 'dul gyi thabs sna tshogs pa ston pa'i sgo nas smin par bya ba'i phyir dang / mthar thug don gnyis lhun gyis grub pa rnam pa thams cad mkhyen pa'i gnas bsgrub pa'i phyir/ shes bya'i yul mtha' dag la mi bslab pa 'ga' yang med de/ mgon po byams pas/ rig pa'i gnas lnga dag la brtson par ma byas na/ /'phags pa'i mchog ste thams cad mkhyen nyid ga la thob/ /de ltar gzhan dag tshar gcad pa dang rjes gzung phyir/ /bdag nyid kun shes bya phyir de la de brtson bya/ /zhes dang / 'jam mgon sa skya paNDi tas kyang / rang blo shes bya kun la ma sbyangs na/ /thams cad mkhyen pa nam mkha'i mtha' ltar ring / /de ltar dgongs nas rgyal dang de sras kyis/ /shes bya'i gnas kun sbyangs zhes legs par gsungs/ /zhes so/ /des na rgyal ba'i myu gu blo dang ldan pa rnams ni shes bya rig pa'i gnas yan lag dang bcas pa mtha' dag la thos bsam gyi bslab sbyang bya dgos par gsungs so/ /kha cig na re de ni rgyal ba'i sras blo mchog dang ldan pa rnams kyi ngor gsungs kyi deng dus rang cag lta bu'i blo gros rtul zhing brtson 'grus shin tu dman pa'i mthar thug pa dag la ni ma yin te/ rang nyid kyis nyams su len pa dang gzhan la 'chad pa la sogs pa bsgrub pa'i nus pa phra ba'i phyir zhe na/ rang nyid kyis nyams su len pa dang gzhan la phan gdags par 'dod pa'i bsam pa sems bskyed kyis zin