[A:61]so/ /de'ang yang dag pa'i ye shes bsgom byung gi yon tan rnams rgyud la bskyed pa la/ thos pa'i don la rnam par dpyod pa'i bsam byung gi shes rab sngon du 'gro dgos so/ /de'i sngon du'ang sngon chad thos par ma gyur pa'i phyi dang nang gi shes bya'i gzhung lugs gong du smos pa mtha' dag gam/ bye brag tu gang la gang dgos pa'i chos rnams legs par thos dgos te/ byang chub sems dpa'i sde snod las/ thos pas chos rnams shes par 'gyur/ /thos pas sdig las ldog par 'gyur/ /thos pas don med spang bar 'gyur/ /thos pas mya ngan 'das pa thob/ /ces dang / skyes rabs las/ gang zhig thos pas yid ni dad gyur nas/ /legs par dga' la brtan pa nyid du 'gyur/ /shes rab skye zhing gti mug med par 'gyur/ /rang gis shes kyang de ni nyo bar rig sa/ /thos pa gti mug mun sel sgron me yin/ /rkun po la sogs mi 'khyer nor gyi mchog / kun tu rmongs pa'i dgra 'joms mtshon cha yin/ /thabs tshul man ngag ston pas grogs kyi mchog / phongs par gyur kyang mi 'gyur mdza' bo yin/ /gnod pa med pa mya ngan nad kyi sman/ /nyes pa chen po'i dgra 'joms dpung gi mchog / grags dang dpal gyi gter gyi mchog kyang yin/ /ya rabs rnams dang 'phrad na skyes kyi mchog / tshogs kyi nang na mkhas pa mgu bar 'gyur/ /zhes dang / spyod 'jug las kyang / rgyal sras rnams la mi slob pa'i/ /dngos de 'ga' yang yod ma yin/ /de ltar gnas pa'i mkhas pa la/ /bsod nams mi 'gyur gang yang med/