[A:79]par mnyan dgos par sems so/ /'dir smras pa/ gnyis med gsung ba sras dang bcas pa yis/ /legs gsungs bdud rtsis nyal ba'i dal 'byor rten/ /'di phyi gtan 'dun grub pa'i skal ba can/ /lhar bcas skye dgu'i phyag 'os bla na med/ /srid zhi'i dngos po mtha' dag rjod byed kyi/ /lam nas bde bar 'dren byed yi ge nas/ /nyer brtsams gtsug lag rig pa'i ngo mtshar gzugs/ /snang byed mkhas pa'i me long gang byon dang / /rgyal bstan brjod byar gyur pa'i so sor thar/ /byang chub sems bskyed sdom pa zung gi rgyun/ /'bogs pa'i byed po dge ba'i bshes kyi drin/ /gzugs can zhig na srid pas ci ste theg/ ring min phyag rgya chen po mchog gi dngos/ /'grub byed sngags kyi sdom pas skal ba bzang / /sku bzhi'i sa bon 'jog pa'i slob dpon de/ /dkon mchog gsum las logs shig dmigs su ci/ /e ma skyabs mchog yid bzhin nor bu rnams/ /deng nas byang chub snying po mchis kyi bar/ /'bral med gtsug gi rgyan du mnyam 'grogs par/ /nyin mtshan gsol 'debs gser gyi skud pas btsems/ /zhes dam pa'i chos thos pa'i yi ge don gnyer gdengs can rol pa'i chu gter las/ 'jug sgo shes pa'i ched du thos bsam la rim gyis slob pa'i tshul gyi sarga ste gnyis pa'o/ // /spyi don gsum pa thos don yid ches ched du chos kyi brgyud rim bstan pa la gnyis/ bstan pa'i 'jug sgo so thar gyi sdom par gnas pa'i chos kyi brgyud rim/ sdom par gnas pas thos bsam ji ltar byas pa'i chos kyi brgyud rim