[A:80]mo/ /dang po ni/ chos mngon pa mdzod las/ tshul gnas thos dang bsam ldan pas/ /bsgom pa la ni rab tu sbyar/ /zhes dang / dge slong la rab tu gces pa'i mdo las/ shin tu legs par tshul khrims gang / /sdom pa'i mi de mdzes pa'i gzugs/ /'dul ba la ni nye bar gnas/ /tshul khrims bslab pa rang yid ches/ /mi de nyi ma gcig la yang / /bsod nams phung po dpag tu med/ /gsog cig sangs rgyas 'bras bu 'grub/ /ces dang / 'phags pa klu sgrub zhabs kyis kyang / khrims ni rgyu dang mi rgyu'i sa bzhin du/ /yon tan kun gyi gzhi rten lags pa gsungs/ /zhes gsungs pa ltar/ thog mar yon tan phun sum tshogs pa thams cad kyi gzhi tshul khrims kyi bslab pa la gnas pa ste thos bsam sgom gsum gyi dge ba gang dag bsags pa thams cad byang chub chen po'i rgyur 'gyur ba'i phan yon yod pa rjes su thos pa'i 'grogs bshes dag gis khrid de/ rang lo bcu gcig tu son par 'bri klung gser dang ldan ma'i rgyun chen po dal gyis gzhol phyogs su gya gyur bgrod pa'i 'gram ngogs yin pas ldan yul zhes grags pa ga la ba der/ dpal sa skya'i lha khang bla brang gi gdung brgyud dri ma med pa mkhyen brtse nus pa'i yon tan rgya mtsho lta bu la dbang 'byor ba 'jam dpal dbyangs rin chen rgyal mtshan bkra shis grags pa'i rgyal mtshan dpal bzang po pa'i zhabs kyis bcags shing legs par bskrun pa'i dgon sde sa dkar bsam 'grub gling zhes btags pa/ de nas brtsams te lha rigs bdag chen 'jam pa'i dbyangs kun dga' blo gros pa dang / de'i