[A:482]su ma smos kyang glegs bam gyi gras su sngar yod pa dang phyis rnyed pa gsar 'dzud zhus pa rnams yin pas/ slar 'di dag gi lung rgyun brgyud pa yid ches pa las btsal te rgya cher spel dgos so zhes shes pa'i ched du bzhag pa yin pas bstan pa rin po che la gces spras byed pa rnams kyis dgongs 'tshal/ ji skad bshad pa'i bstan bcos rin po che de rnams kyi lung mnos pa'i brgyud pa ni/ gong ma yab sras gsum po'i gsung rab rnams kyi lung dang glegs bam dang po nas phyogs gcig tu bsdebs pa ma byung ba la/ dus phyis bla ma dpal ldan sengge'i thugs dgongs rdzogs pa'i phyir du chos rje bla ma dam pa bsod nam rgyal mtshan dpal bzang po pas rang nyid la gang bzhugs pa rnams mkhan chen shes rab rdo rje dang / dbus pa rin chen rgyal mtshan gnyis la gnang / ma bzhugs pa rnams mkhan po shes rab rdo rje dang / dbus pa rin rgyal gnyis la bkas bskul te phyogs kun tu btang nas lung su yod las zhur bcug cing dpe rnams phyogs gcig glegs bam du bsdebs pa mdzad/ chos rje bla ma dam pas kyang sngar ma gsan pa rnams sher rdor ba las gsan pas lung thams cad phyogs gcig nas brgyud pa med mod/ 'on kyang mkhan po shes rab rdo rjes bla ma so so las gsan pa'i brgyud pa ni lam 'bras la sogs pa'i lam skor dgu/ man ngag gces bsdus dang bcas pa'i brgyud pa ni/ rje sa skya pa chen po kun dga' snying po/ slob dpon rin po che bsod nams rtse mo/ rje btsun rin po che grags pa rgyal mtshan/ chos rje sa skya paNDi ta kun dga' rgyal