[A:268]སོའི་སྐད་དང་མཐུན་པར་སྩལ་བའི་ཚད་ནི་ནམ་མཁའི་ཕ་མཐའ་བཞིན་རྟོགས་པར་དཀའ་བས་ཉན་རང་གི །སློབ་མི་སློབ་ཀྱི་འཕགས་པ་རྣམས་དང་སྲིད་པ་རྒྱུན་གྱི་མཐའ་མའི་བྱང་ཆུབ་སེམས་དཔའ་རྣམས་ཀྱིས་ཀྱང་འདི་ཙམ་མོ་ཞེས་གཟུང་བར་མི་ནུས་ན་སོ་སོ་སྐྱེ་བོ་རྣམས་ཀྱི་ཡུལ་ལྟ་ག་ལ་ཞིག །འོན་ཏེ་རྒྱ་མཚོ་ལས་ཆུ་ཐིགས་ཙམ་ཞིག་ཡུལ་དབུས་འགྱུར་འཆང་སོགས་སུ་འཕགས་པ་དགྲ་བཅོམ་པ་རྣམས་ཀྱི་བཀའ་བསྡུ་བ་རིམ་པ་གསུམ་དང་འཛམ་གླིང་མཛེས་པར་བྱེད་པའི་རྒྱན་དྲུག་མཆོག་གཉིས། མངོན་པར་རྟོགས་པའི་ས་ལམ་མཐོན་པོར་གཤེགས་པའི་གྲུབ་ཆེན་བརྒྱད་བཅུ་རྩ་བཞི་སོགས་སྐྱེས་ཆེན་དུ་མས་འཐོར་བ་སྡུད་པ་དང་འཆད་ཉན་གྱིས་གཏན་ལ་ཕབ་སྟེ་ཐོས་བསམ་སྒོམ་པའི་ཆུ་བོ་གཅིག་ཏུ་འཁྱིལ་བའི་མ་དྲོས་པའི་མཚོ་ཆེན་པོ་ལས་བྱང་ཕྱོགས་གངས་རིའི་ར་བས་བསྐོར་བའི་སྨན་ལྗོངས་འདིར་མདོ་རྒྱུད་ཆུ་ཀླུང་ཉེ་བར་བབས་པའི་ཐོག་མ་ཕོ་བྲང་ཡོམ་བུ་གླ་སྒང་གི་ཡང་ཐོག་ཏུ་དཔལ་ཀུན་ཏུ་བཟང་པོའི་རྣམ་པར་སྤྲུལ་པ་ལྷ་ཐོ་ཐོ་རི་བཞུགས་པའི་ཕྱག་ཏུ་ཉི་ཟེར་དང་ལྷན་ཅིག་པར་གསེར་ཤོག་ལ་བཻཌཱུརྱས་བྲིས་པའི་དཔང་སྐོང་ཕྱག་བརྒྱ་པ་མདོ་སྡེ་ཟ་མ་ཏོག་བབས་པས་བསྟན་པའི་དབུ་བརྙེས། ལག་ན་པདྨ་མིའི་གཟུགས་ཅན་སྲོང་བཙན་སྒམ་པོའི་དུས་འཇམ་པའི་དབྱངས་ཀྱི་སྤྲུལ་པ་ཐུ་མི་སམྦྷོ་ཊས་རིན་པོ་ཆེས་ཏོག་གི་གཟུངས། ཤེར་ཕྱིན་འབུམ་པ། ཐུགས་རྗེ་ཆེན་པོའི་མདོ་རྒྱུད་ཉི་ཤུ་རྩ་གཅིག་བསྒྱུར་བ་སོགས་བསྟན་པའི་སྲོལ་བཏོད། འཇམ་དཔལ་རྡོ་རྗེའི་སྤྲུལ་པ་རྗེ་ཁྲི་སྲོང་ལྡེ་བཙན་གྱི་སྐུ་རིང་ལ་མཁན་སློབ་གཉིས་དང་བཻ་རོ་ཙ་ན་སོགས་ལོ་པཎ་མང་པོ་དབུའི་བླ་མཆོད་དུ་བསྐུར་ཏེ་ཐེག་པ་ཆེ་ཆུང་གི་བཀའ་དགོངས་འགྲེལ་མཐའ་ཀླས་པ་བསྒྱུར་ནས་བསྟན་པ་དར་རྒྱས་སུ་མཛད། སད་ན་ལེགས་འཇིང་ཡོན་གྱི་དུས་བནྡེ་དཔལ་