[A:༥༥༧]འདི་རེས་གོང་དཀར་ནས་གཞུང་རྔོག་ཚང་འོག་མ་ཐར་པ་གླིང་དུ་ཕེབས་པར་གནས་དེ་གར་ཕྱི་སྒྲུབ་ཀྱི་རྗེས་གནང་དང་སྒྲུབ་སྐོར་ཡོངས་སུ་རྫོགས་པ་གནང་བའི་རྗེས་གནང་གི་དུས་ལྟས་ཁྱད་པར་ཅན་ཞིག་ཀྱང་གཟིགས་པས་བླ་མ་དང་ལྷ་ལ་མི་ལྡོག་པའི་ཐུགས་དད་ཆེན་པོ་འཁྲུངས། ཕྱོགས་དེར་བླ་མའི་སྐུ་དགྲ་གདུག་པ་ཅན་ཞིག་འདུག་པར་འདི་ལྟ་བུའི་ཆོས་སྐྱོང་ཡོད་བཞིན་དུ་བསྟན་དགྲ་ཡལ་བར་འདོར་མི་རུང་ཚུལ་ཞུ་བ་མཛད་པའི་ལན་དུ། ཁོང་ཚོའང་ལྷ་འདི་མཆོད་པ་དང་མགོན་ཁང་གི་སྐུ་རྒྱབ་བསྟན་པ་སོགས་ཀྱིས་ཡིན་ནམ་སྔར་ཕན་རྟགས་མཚན་གང་ཡང་མ་བྱུང༌། ལན་ཆགས་འདེད་པ་ལྟ་བུར་མཆིས་པས་ད་དུང་ཅི་འདྲ་ཡོང་ཞེས་ཐུགས་ཆད་དེ་བ་མཛད་པར། དེས་ན་ཁོ་བོ་ལ་ཆོས་ཀྱི་བཀའ་དྲིན་སྩལ་བའི་ཡོན་དུ་དམ་ཉམས་འདི་སྒྲོལ་བ་ལགས་ཞེས་གསོལ་བར་ཤིན་ཏུ་དགྱེས་པའི་ལེགས་སོ་གནང་བ་ན། ཁྱབ་བདག་བླ་མ་འདི་ཉིད་ཀྱིས་ལྷ་མོའི་ལྗགས་བསྙེན་འབུམ་ལྔ་བཅུ་ཙམ་སྔར་གནང་ཟིན་པའི་མགོན་པོའི་ཡུམ་འདོད་ཁམས་མ་དང་དུད་སོལ་མ་གཉིས་ཐུགས་རྒྱུད་གཅིག་པར་བཞེད་གཤིས་ལྷ་ཉེ་བར་ཟུར་དུ་བསྙེན་པ་གནང་མ་དགོས་པ་ནས། གནས་དེ་གའི་མགོན་ཁང་རྔོག་སྟོན་གོང་མས་བཞེངས་པའི་སྐུ་བྱིན་ཅན་གཟི་བྱིན་བསྐྱེད་པ་དང་དགྲ་བོ་ཞལ་དུ་འདེབས་པའི་བཅས་ལེགས་པར་བསྒྲིགས་ནས་བསྟན་སྲུང་གི་ཞལ་དུ་དམར་སྟོབ་མཛད་ཚུལ། །དུད་སོལ་མའི་ཆོས་སྐོར་གྱི་དཀར་ཆག་ལས། ས་རྔོག་བླ་མ་བརྒྱུད་པའི་མཚན་ནས་བརྗོད་དེ་བཀའ་བསྒོ་དྲག་པོ་ལན་གསུམ་བྱས་པས་རང་ཉིད་ཀྱང་སྐྱི་བུན་པ་དང་ལྷ་མོའི་སྐུ་འདྲ་དེའང་ཞལ་ཁྲོ་ཞིང་ཞལ་རས་ནག་ངམ་བྱས་