[A:1028]ནད་ཅི་ཡིན་པ་ཐམས་ཅད་སལ་ལེ་མཁྱེན་པ་བྱུང་ནས་འདྲེ་འདུལ་མང་དུ་བྱས། ཡོན་ཡང་ཆེ་བར་བླངས། ཡོ་བྱད་མང་དུ་རྙེད་པས་ཡོ་བྱད་རྣམས་ཀྱིས་ཡར་མདར་གཞིས་ཤིག་ཉོས་ནས་ཕ་མ་དང་སྤུན་ཟླ་དེར་བཞག གཞན་རྣམས་ཡར་མདར་བཞག་ནས་གྲུབ་ཐོབ་ཕོ་མོ་ལྔ་བཅུ་རྩ་བཞིའི་དཔེ་རྣམས་ཨ་མ་ཤུང་མོ་ཤཱཀ་སྒྲོན་ལ་བཅོལ་བས་དཔེ་ལ་ཐེམ་ཤོག་བྱས་པས་བརྒྱུད་པ་བརྒྱད་མ་ཚང་གཞན་རྣམས་ལ་སོ་ཆུང་པ་རང་གིས་བྱས་པ་དེ་ཡིན་ནམ་ལྷུག་པ་རྒྱས་པ་ཅིག་བཞུགས། ཕྱིས་འཆུས་པ་དར་བརྩོན་གྱིས་དམ་པ་སྐྱེས་མཆོག་ཆེ་འབྲིང་ཆུང་གསུམ་དུ་བཏགས་ནས་ཚིགས་སུ་བཅད་པར་སྡེབས། སོ་ཆུང་བས་དམ་པ་དིང་རི་ན་བཞུགས་པར་ཐོས་ཏེ་ནད་པ་གསོས་པའི་ཡོན་གྱི་གསེར་སྲང་གསུམ་དང་རྟ་ཕོ་བཟང་བ་ཅིག་ཁྱེར་ནས་དིང་རིར་སླེབ་པ་ན་དམ་པ་ཁྲོམ་གྱི་དཀྱིལ་ན་བཞུགས་འདུག་པས་གསེར་སྲང་གསུམ་པོ་དེ་དམ་པའི་པང་དུ་སྐྱུར། དགའ་གྲགས་ནས་དམ་པའི་པང་དུ་མཆོངས་ཏེ་དབུ་ནས་རལ་བ་ཅིང་ཀྱང་ཕྱི། དེར་ཡོས་རྒྱོབ་རྒྱོབ་ཟེར་བ་ལ། དམ་པའི་གསུང་ནས། ཁོ་ལ་མ་བརྡེག་ཅིག་ཁོ་ལ་བདག་པོ་བཟང་པོ་ཡོད་དོ་གསུང༌། གསེར་དེ་བུད་མེད་ཅིག་གིས་ཙེན་གྱི་ཇངས་སོང་བ་སུ་ཁ་སིདྡྷིས་མཁའ་འགྲོ་མའི་ཚོགས་འཁོར་གྱི་རྒྱུ་ལ་འཁྱེར་བ་ཡིན་ཟེར། དེར་ལངས་ཏེ་མགུར་ཅིག་ཀྱང་བླངས་པས་ཀུན་གྱིས་གྲུབ་ཐོབ་ཏུ་ཤེས། དེ་རེས་དམ་པས་མཐའ་སེལ་ལྔ་བཅུ་རྩ་གཅིག་གི་གདམས་པ་གནང༌། དེ་ནས་ཡང་ཕྱིར་དབུས་སུ་བྱོན་ནོ། །