[A:1040]འདི་འགྲོ་བའི་མགོན་པོ་ཕག་མོ་གྲུབ་པའི་ལོ་བཅུ་བདུན་པ་ཤ་མིའི་བཞི་བཅུ་རྩ་གཉིས་པ་ལ་འཁྲུངས་པ་ཡིན། མེ་ཕོ་རྟ་དེའི་ཕྱི་ལོ་མེ་མོ་ལུག་ལ་རྟེན་ནེ་འཁྲུངས། ཀ་བ་ཅན་པ་དྲུག་ཅུ་རྩ་གཅིག་པ་མེ་ཕོ་རྟ་ལ་སྙེ་མདོ་བ་སྨྲ་བའི་སེང་གེ་འཁྲུངས་པ་ཡིན་ནོ། །ཀ་བ་ཅན་པ་འདི་ལ་སློབ་དཔོན་ཀུན་བཟངས་ཤེས་བྱ་བས་གཏུགས་ཏེ། དོན་རྒྱུད་ཞུས་ཤིང༌། ཀ་བ་ཅན་པའི་ཇོ་མོ་དང༌། ཇོ་སྲས་ལའང་དོན་རྒྱུད་ཞུས་ཟེར་བ་འདུག་སྟེ། སློབ་དཔོན་ཀུན་བཟངས་འདིའི་ལོ་རྒྱུས་ནི་རྡོ་རྗེ་ཟམ་པའི་ལོ་རྒྱུས་སུ་ཤེས་པར་བྱའོ། །ཀ་བ་ཅན་པས་བྱིན་གྱིས་བརླསབ་པ་དགྱེར་སྒོམ་ཆེན་པོ་ཡིན་ཏེ། དེའི་ལོ་རྒྱུས་ནི། ཡུལ་ཡར་ཀླུངས་གཤོང་བ་ན་དགྱེར་བེ་གུ་བ་དང་ནི་གུ་བ་གཉིས་ལས་ནང་ཚན་བེ་གུ་བ། ཡང་དགོས་ཁང་གསར་བ། ཁྲ་འབྲུག་པའི་དཔོན་བརྒྱུད་ཡིན། ཡབ་དམག་དཔོན་དཀོན་མཆོག་སྐྱབས། ཡུམ་རྒྱལ་ཚ་མ་མདོ་སྡེ་རྒྱན་གཉིས་ཀྱི་སྲས་སུ་ཤིང་ཕོ་བྱི་བ་ལ་འཁྲུངས། མཚན་ཆོས་ཀྱི་སེང་གེར་བཏགས། གཅུང་པོ་དམག་དཔོན་ཆོས་རྡོར་ཏེ་སྐུ་མཆེད་གཉིས་ཀྱི་ཆེ་བ་ཆོས་སེང་དགུང་ལོ་བཅུ་གཅིག་ལ་རབ་ཏུ་བྱུང་སྟེ། མཚན་ཚུལ་ཁྲིམས་སེང་གེ ཁྲ་འབྲུག་གི་དཔོན་གཉེར་ཀྱང་མཛད། དགེ་བཤེས་ཧོར་ལ་གསང་འདུས་ཀྱི་དབང་ཞུས་པའི་གསང་མཚན་རྡོ་རྗེ་རྒྱལ་པོ་ཞེས་བྱ། དེར་གསང་འདུས་ཀྱི་རྩ་འགྲེལ་ལ་སོགས་པ་གསན། དཔལ་ཕག་མོ་གྲུ་པའི་སྙན་པ་ཤིན་ཏུ་ཆེ་བར་ཡོད་པས་དགུང་ལོ་བཅུ་དགུལ་མཐའ་རྩར་བྱོན། དགོན་པ་མཐོང་བ་ཙམ་གྱིས་དད་པ་ཐུན་མོང་མ་ཡིན་པ་སྐྱེས། དཔལ་ཕག་