[A:1044]བཏང༌། དེ་དགྱེར་གྱིས་མཁྱེན་ནས་དེ་རིང་རིན་ཆེན་སྙིང་པོ་འོང་བར་འདུག ཁྱེད་གྲྭ་པ་རྣམས་ཀྱིས་བསུ་བ་གྱིས། ང་བས་ཁོ་བཟང་བ་ཅིག་འོང་བ་ཡིན་གསུང༌། སྟག་ལུང་ལ་ཁ་ན་ཚུར་བྱོན་པ་ལ་བསུ་བ་བྱས། གྲྭ་པ་ཐམས་ཅད་ཁོང་གི་མཛད་སྤྱོད་ལ་མཉེས། དགོན་པར་བཞུགས་ནས་དགྱེར་དང་མཇལ། རབ་ཏུ་བྱུང་ནས་མཚན་རིན་ཆེན་དབང་ཕྱུག་ཏུ་བཏགས། དགྱེར་གྱི་སྤྱན་སྔར་རྟེན་འབྲེལ་ལ་སོགས་པ་སྙེ་ཕུ་བའི་ཆོས་གསུམ། དོ་ཧ་གསུམ་ཁྲིད་དང་བཅས་པ་ཞུས་ཤིང༌། དགྱེར་སྐུ་གཤེགས་རྗེས་དམར་བུ་བྲག་པས་དཔོན་པོའི་ཞབས་ཏོག་ངས་བྱེད་གསུང་ནས་མཛོད་མར་གདན་དྲངས། འཕྲལ་གྱི་ཞབས་ཏོག་དང་སྙེ་ཕུ་བའི་ཆོས་སྐོར་རྣམས་ཀྱི་ཚགས་བསྡམས་ཤིང༌། བདེ་མཆོག་སྙན་བརྒྱུད་དང་ལུས་མེད་མཁའ་འགྲོའི་ཆོས་སྐོར་ལ་སོགས་གནང༌། རྒྱ་མཁར་གཤེགས་ནས་སྙེ་ཕུའི་གདན་ས་མཛད་དེ། གྲྭ་བུ་སློབ་རྣམས་གདམས་པས་བསྐྱངས་ཏེ། ཤུག་གསེབ་དབུས་གླིང་གི་གཟིམས་ཁང་དུ་ངོ་མཚར་གྱི་ལྟས་དང་བཅས་ཏེ་སྐུ་གཤེགས་སོ། །དེའི་སློབ་མ་བྲག་འབུར་བའི་ལོ་རྒྱུས་ནི། དམག་དཔོན་ཆོས་རྡོར་གྱི་སྲས་ལྔའི་གཉིས་པ་དར་རེ་ལ་སྲས་སངས་རྒྱས་རྡོ་རྗེ། ཙ་རི་བ་ཆོས་ཀྱི་བླ་མ། བྲག་འབུར་བ་དང་གསུམ་ལས། བྲག་འབུར་བ་སྐུ་གཞོན་ནུ་ནས་སངས་རྒྱས་དབོན་གྱི་ཞབས་ལ་གཏུགས། རབ་ཏུ་བྱུང་ནས་མཚན་རིན་ཆེན་དབང་ཕྱུག་ཏུ་བཏགས། རྡོ་འོན་གྱི་དབེན་གནས་རྣམས་སུ་