[A:1057]
བརྒྱུད་ཕྲན་གྱི་སྐབས།
བར་དུ་བྱུང་བའི་རྒྱུད་ཕྲན་ལ་གྲྭ་པ་དང༌། ལྕེ་དང༌། ལྗང་ལུགས་གསུམ་མོ། དེ་ལ་དགེ་བཤེས་གྲ་པ་ལ་ཞི་བྱེད་སྒྲོན་མ་དགུ་སྐོར་གྱི་གདམས་པ་གནང་སྟེ། དེ་ལ་མན་ངག་སྐུའི་སྒྲོན་མ། ཐེག་པ་གསུང་གི་སྒྲོན་མ། གསང་བ་ཐུགས་ཀྱི་སྒྲོན་མ། ཡང་དག་ལྟ་བའི་སྒྲོན་མ། རིན་པོ་ཆེ་སྒོམ་པའི་སྒྲོན་མ། བྱང་ཆུབ་སྤྱོད་པའི་སྒྲོན་མ། མཉམ་ཉིད་གཞིའི་སྒྲོན་མ། རྣལ་འབྱོར་ལམ་གྱི་སྒྲོན་མ། དངོས་གྲུབ་འབྲས་བུའི་སྒྲོན་མ་རྣམས་སོ། དེ་ཡང་དམ་པས་གྲ་ཐང་དུ་བྱོན་པ་ལ། ཨ་ཙ་ར་ཕལ་པའོ་སྙམ་ནས་བཀུར་སྟི་མ་བྱས་པ་ལ། སང་ངོ་ཨ་ཙ་རའི་སྟན་གྱི་སོག་མ་རྣམས་སྤུབས་མ་ཞར་བར་འདུག་པ་མཐོང་ནས། དགེ་བཤེས་གྲ་པ་ལ་ཞུས་པས། དགེ་བཤེས་པའི་ཐུགས་ལ་དམ་པ་སངས་རྒྱས་ཡིན་ངེས་དགོངས་ནས་བརྒྱུགས་པས་གྲ་ཕྱི་མདར་ཟིན། གསེར་ཕུལ་བས་མ་བཞེད་ཀྱང་ཕྱིས་འབྱོན་པའི་ཞལ་བཞེས་བྱུང་ནས། སླར་གྲ་ཐང་དུ་བྱོན་ཏེ་སྒྲོན་མ་སྐོར་དགུ་པོ་གསུངས། དགེ་བཤེས་གྲ་པས་སྲིན་ཆུའི་བྲག་ལ་སུམ་བཙུན་ཆུང་ལ། དེས་དོ་རིར་མྱང་སྟོན་དོ་པ་ལ། དེས་ཤབ་ཀྱི་བླ་ཆུང་འོད་ཟེར་ལ། དེས་ཤངས་སུ་འཆུས་པ་དར་བརྩོན་ལ་གནང་སྟེ། དེས་གྲུབ་བསམ་ཀྱང་ཞེས་མཛད་དོ། དེས་འཆུས་པ་བརྩོན་སེང་ལ་གསུངས།