[A:1078]འདིའི་བདག་པོ་སུ་ཡིན་བྱས་པས། འདི་ངས་དམ་པ་སངས་རྒྱས་ཟེར་བའི་གྲུབ་ཐོབ་ཅིག་ལ་ཞུས་པ་ཡིན། ཁོ་རྒྱ་ནག་ཏུ་བཞུད། ད་ལྟ་དིང་རི་ན་ཕེབས་འདུག་གམ་ཟེར་ཏེ་ང་རྒས་པས་མི་ཐོན། ཁྱེད་རང་གཞོན་པར་འདུག་པས་དེར་བྱོན་ན་མཇལ་འོང་ངམ་གསུང་བས༌། ཕ་ཞིང་གསེར་གཡུ་དང་དར་ཟབ་ཏུ་བསྒྱུར་ནས་བྱོན་པ་ལ་ལམ་དུ་གྲོགས་མེད་པས་རིང་རབ་འགོར། དིང་རིར་ཕེབས་པའི་ནུབ་མོ་ཚ་ཁུང་དུ་བཞུགས༌། ནང་པར་སྔ་བར་བྱོན་ནས་བཙུག་ཏོར་སྒང་གི་རྩེ་ནས་གཟིགས་པས་ཁྲོན་ཆེན་པོ་ཚོགས་འདུག་པས་དམ་པ་བཞུགས་པ་ཡིན་ཏེ་འོང་སྙམ་ནས་ཧལ་ཐབས་སུ་བྱོན་པ་ན། ཁྲོམ་གྱི་སར་མ་སླེབ་ཙམ་ན་དུ་བ་སྔོ་རིང་གིས་བྱུང་བས་དེར་སྤྲང་མོ་ཅིག་འདུག་པ་ལ་ཅི་ཡིན་དྲིས་པས་དམ་པའི་གདུང་བཞུ་བའི་དུ་བ་ཡིན་ཟེར་བས༌། དེར་གམ་གྲགས་པས་རིང་ཞིག་ཏུ་བརྒྱལ། དེ་སངས་ཙ་ན་སྤྲང་མོས་དབུ་པང་དུ་བླངས་འདུག །མང་དུ་བཤུམས་པས་སྤྲང་མོ་དེ་ན་རེ༌། སློབ་དཔོན་སྟོན་པ་དུ་མི་འཚར། དང་པ་གྲོངས་ཀྱང་དམ་པ་ཉིད་དང་མཉམ་པའི་དབུ་ཆེ་མང་དུ་བཞུགས༌། ཁྱེད་རང་གི་དགོས་དོན་གྲུབ་སྟེ་མཆི་ཟེར༌། ཤར་ཕྱོགས་ཕ་གི་ན་དམ་པ་ཕྱར་ཆེན་པོ་བྱ་བ་ཁྱེད་རང་དང་རྟེན་མཐུན་པ་ཅིག་བཞུགས་དེར་བྱོན་དང་ཟེར་བས། ག་ལེ་བྱོན་པས་ཡང་སྤྲང་མོ་དེ་བརྒྱུགས་བྱུང་ནས༌། དབུས་པ་སྟོན་པ༌། ཁྱོད་ཕྱར་ཆེན་གྱི་བུར་མི་འདུག །དམ་པ་ཀུན་དགའི་བུར་འདུག་པས་རྡོ་སྤྱིལ་ཕ་གིར་སོང་ཞིག་ཟེར་མས་དེར་ཕྱིན༌། སྒོ་རྩ་ནས་སྐྱབས་སུ་མཆིའོ་བྱས་ཏེ་ཕྱག་མང་དུ་བཙལ་བས༌། ཀུན་དགའང་ཅི་ནས་