[A:1100]བགྲེས་ཆེས་པས་ཞིབ་ཚེགས་མང་པོ་སྲས་མོ་སྐལ་ལྡན་ལ་ཞུས། དེ་ནས་རྩེ་སྒང་དུ་ཕེབས་པ་ན་སྔར་དམ་བཅའ་དཀའ་ཐུབ་མཐར་མ་སྐྱོལ་བའི་སྐྱོན་གྱིས་ཤངས་ཁྲག་བདུན་དུ་ཤོར། སྨན་དང་རིམ་གྲོ་ཅི་བྱས་ཀྱང་མ་ཕན་པ་ལ། སྤྱིར་བླ་མ་རྣམས་ལ་མོས་གུས་བྱས། ཁྱད་པར་སོ་དར་མ་སེང་གེ་དྲན་པ་ཅིག་བྱུང་བས། དར་མ་སེང་གེ་བེར་སྔོན་གྱི་ན་བཟའ་གསོལ་བ་ཅིག་མདུན་གྱི་བར་སྣང་ལ་བྱོན་ནས་ཕྱག་གིས་སྨིན་མཚམས་སུ་རེག་པར་སྣང་བ་ཅིག་བྱུང་བས་ཁྲག་འོལ་ཁ་བསྒྱུར་བ་བཞིན་དུ་ཆད། དེ་ནས་ཡང་རོག་སྟོན་བཙན་པོ་གཤེགས་པའི་རྗེས་འདུར་གྱིས་ཏེ་ནེ་སྤྱན་འདྲེན་པའི་དུས་དེ་ཡོལ། དེ་ནས་བང་རིམ་ན་བཞུགས་ཙ་ན་རྨི་ལམ་དུ་བུད་མེད་འགྲོན་བུའི་རྒྱན་ཅན་ཅིག་ན་རེ། རྒྱལ་བ་ཏེ་ནེ་ཁྱེད་ཀྱི་གདན་འདྲེན་སྒུག་གི་འདུག་ཟེར། དེར་མི་བཞི་གདན་འདྲེན་དུ་བཏང་བས་རྗེ་བཙུན་འོན་མདར་ཡོན་བདག་ལྕགས་འབར་གྱི་སར་བཞུགས་པ་དང་མཇལ་ཏེ་དགྱེས་པར་གྱུར། དེ་ནུབ་དཔེ་དགོས་པ་རྣམས་ཁོང་རྣམས་ལ་བསྐུར་ནས་ནང་པར་དེ་ཁ་ཡར་བྱོན། རྒྱབས་སུ་ཡར་ཆེན་རེའུ་དགེས་གཞི་བྱས་ནས་དབང་གནང་བའི་ཚེ་ཞིག་པོ་ཡང་བྱོན་ནས། ཨཱ་ལི་ཀཱ་ལིའི་དབང་ཡོན་མཆོད་བཞི་བཅུ་ཙམ་གྱིས་ཞུས། དེ་ནས་བང་རིམས་སུ་བཏེག་ནས་བཀའ་བབས་དྲི་མེད་ལ་སོགས་པ་ཐུན་མོང་གི་ཆོས་རྣམས་ཟླ་བ་གསུམ་གྱི་བར་དུ་གནང༌། ཡང་ཕྱིས་ཕེབས་ཏེ་དེ་རེས་ཚོགས་ཅིག་ཀྱང་ཤོམས་དང༌། ཆོས་འདྲ་བ་བྱ་རྒྱུ་ཡོད་གསུང་ནས་ཐུན་མོང་མ་ཡིན་པའི་གདམས་པ་རྒྱུད་སྟོང་ཐུན་དང་བཅས། དབང་ལམ་ཁྲིད་དང་