[A:1124]སྟོང་གསུམ་གཟིགས་ཤིང་སྐུ་ལུས་ཀྱང་ཤིན་ཏུ་ཆེ་བར་གྱུར་པ་དང༌། རྗེ་བཙུན་མའི་དབང་ཞུས་པའི་དུས་སུ་བླ་མ་རྗེ་བཙུན་མར་གཟིགས་པ་དང༌། ཕུར་བའི་བསྙེན་པའི་དུས་སུ་ཕུར་པ་ལས་འོད་དམར་པོ་མར་མེ་ཙམ་ཞིག་ཞག་མང་དུ་བྱུང་བ་དང༌། མནལ་ལམ་དུ་རི་ཕན་ཚུན་ཕྱག་གིས་གཟུང་ནས་ཆ་ལང་བཞིན་དུ་བརྡེབ་པ་དང༌། ཚེ་བདག་གི་བསྙེན་པའི་དུས་སུ་གཙང་པོ་ཞལ་དུ་གསོལ་བའི་མནལ་ལམ་དང༌། བསམ་གཏན་གླིང་དུ་བཅུ་བཞིའི་གཏོར་མའི་དུས་སུ་ལེགས་ལྡན་ནག་པོ་ཁང་པའི་སྟེང་ནས་བབས་ནས་སྐུ་མདུན་དུ་བྱུང་ནས་ཤོད་དུ་སོང་བ་ཀུན་གྱིས་མཐོང་བ་དང༌། ཟླ་བ་གཟས་གཟུང་བའི་དུས་སུ་བདེ་ཁྲོས་ཀྱི་སྦྱིན་སྲེག་མཛད་པའི་ཚེ་འཇིག་རྟེན་པའི་སྦྱིན་སྲེག་ཚར་ནས་འཇིག་རྟེན་ལས་འདས་པ་ལ་ཟུག་པའི་ཚེ་སྐུ་ལུས་གཟི་མདངས་ཀྱང་སྔར་བས་ཆེ། མེ་ཡང་སྔར་བས་རྒྱུན་རིང་ཞིང་གསལ་བ་ཅིག་བྱུང༌། ཆོ་ག་ཚར་བ་དང་ཁོ་ཐག་ཆོད་པ་ཅིག་བྱུང་གསུང༌། དེའི་རྒྱུ་མཚན་ཞུས་པས་མདུན་བསྐྱེད་ཀྱི་སྐབས་སུ་ཡི་དམ་མེའི་ནང་དུ་དངོས་སུ་བྱོན། བསྲེག་རྫས་དང་མཆོད་པ་རྣམས་མིས་མི་ལ་འདྲེན་པ་བཞིན་བྱས་ཆོག་པར་བྱུང༌། རྟིང་ལ་མཁའ་འགྲོ་ཆོས་སྐྱོང་རྣམས་ཀྱང་བྱོན་ནས་སྐལ་བ་རེ་བླངས་སོང་གསུང༌། བདེ་ཁྲོས་དང་ཕུར་བུ་བ་གཉིས་པོ་བླ་མ་གོང་མ་རྣམས་ཀྱི་ཡང་ཐུགས་དམ་ཡིན། དབང་གི་དུས་སུ་འདི་གཉིས་ཀྱི་དབང་དུས་ཁོ་ན་བྱིན་བརླབས་ཆེ་ཞིང༌། དབང་ཞུས་པས་ནད་གདོན་ཐོན་པ་དང༌། ལྐུགས་པ་ཁ་ཕྱེ་བའང་མང༌། སྨན་སྒྲུབ་ཆེན་མོ་མཛད་པས་སྨན་སྔར་ལས་འཕེལ་