[A:1141]བར་གནས་པ་དང༌། །ཚུལ་བཞིན་མ་ཡིན་ཡིད་བྱེད་ལས། ཉོན་མོངས་སྐྱེ་སྟེ། ཞེས་བཤད་པ་ལྟར། གཅད་པར་བྱ་བ་ནི་ཉོན་མོངས་ཡིན་ལ། ཉོན་མོངས་དེ་དག་ཕྲ་རྒྱས་དང་ཡུལ་དང་ཚུལ་བཞིན་མ་ཡིན་པའི་ཡིད་ལ་བྱེད་པ་ལས་སྐྱེ་བས་ན། རྣལ་འབྱོར་པས་ཡུལ་དེ་ཉེར་བཅུག་ནས་བག་ཆགས་བླང་སྟེ། ཚུལ་བཞིན་མ་ཡིན་པའི་ཡིད་ལ་བྱེད་པ་སྔོན་དུ་འགྲོ་བའི་ཉོན་མོངས་རྣམས་ཡུལ་གྱི་ཐོག་དེ་ཉིད་དུ་གཅོད་པར་བྱེད་པས་གཅོད་ཡུལ་ཞེས་བྱའོ། དེའི་གདམས་ངག་ཀྱང་དམ་པ་ལས་བརྒྱུད་པ་སྟེ། སྐྱོ་བསོད་ནམས་བླ་མ་དང༌། ཡར་ཀླུངས་ཀྱི་རྨང་ར་སེར་པོ་ལས་བརྒྱུད་པ་ལ་ཕོ་གཅོད་ཅེས་བྱ་ལ། མ་གཅིག་ལས་བརྒྱུད་པ་རྣམས་ལ་ནི་མོ་གཅོད་ཅེས་བྱའོ། དམ་པ་སངས་རྒྱས་ཀྱི་གསུང་གིས་ཡར་ཀླུངས་རོག་པ་སར་མ་ཇོ་མཆོད་གནས་མ་ལ་སྙིང་གཏམ་ཚིག་གསུམ་བྱས་པས་མོ་དེས་གྲོལ། ཞེས་གསུངས་པ་ལྟར་རང་ཉིད་དེས་གྲོལ་བ་ཡིན་མོད་ཀྱི། འདི་རང་བཞིན་གྱི་རྣལ་འབྱོར་མ་ཡིན་པས་འཕྲལ་གྱི་གདམས་པའང་མང་དུ་བྱུང་བ་ཡིན་ནོ། འོ་ན་ཅིའི་ཕྱིར་གཞི་གཅིག་ལ་སྤྱོད་ཅེས་བྱ་བ་དང༌། གཅོད་ཅེས་བྱའི་སྒྲ་མི་མཐུན་པ་གཉིས་འཇུག་ཏུ་རུང་ཞེ་ན། འདི་འདྲ་བ་གཞན་དུ་ཡང་མཐོང་སྟེ། ནོར་གྱི་བདག་པོ་གཅིག་ཉིད་ལ་བཻ་ཤྲ་བ་ཎ་ཞེས་བྱས་ནས་རྣམ་ཐོས་ཀྱི་བུ་དང༌། བཻ་ཤྲ་མ་ཎ་བྱས་ནས་ངལ་སོས་ཀྱི་བུ་ཞེས་ཟེར་བ་དང༌། རེས་འགའ་ནི་གང་ཟག་གཅིག་ཉིད་ལ་ནཱ་ག་བོ་དྷི་ཞེས་བྱས་ནས་ཀླུའི་བྱང་ཆུབ་དང༌། ནཱ་ག་བུདྡྷི་ཞེས་བྱས་ནས་ཀླུའི་བློར་བརྗོད་པ་བཞིན་ནོ། བྱེ་བྲག་ཏུ་མན་ངག་སྙེ་མར་བིལ་བ་ལ་འཐུང་སྤྱོད་