[A:1168]ལས། ལྷོ་བ་ནི། ཡུལ་ལ་ཡག་སྨོན་མདའ་པ། རོང་བ་ཆོས་བཟང་གི་སྤྱན་སྔར་ཆོས་མང་དུ་གསན། རབ་ཏུ་བྱུང་ནས་བ་དཀར་འབྲིང་སྟོན་ལ་བསླབ་ཕྱོགས་དང་བྱམས་ཆོས་ལ་སོགས་པའི་ཆོས་མང་དུ་གསན། ཡོལ་ཆོས་དབང་ལ་ཡང་གདམས་ངག་མང་དུ་ཞུས། ཁ་རག་པའི་རྩར་བྱོན་ནས་མར་ཚུད་ཕུལ། གདམས་ངག་གི་ཞུ་བ་མཛད་པས་དེ་མ་ཐག་སྒོ་བསྡམས། གདམས་ངག་ཅན་གཞན་ན་མང་དུ་ཡོད་པ་ཞུས་གསུང་ནས་ལྷོ་བས་བལ་པོ་དབང་རྡོར་གྱི་སར་ལོ་གསུམ་བཞུགས། དེ་ནས་གཙང་བུའི་ཞལ་ནས། ལྷོ་བ་དེ་མ་སོང་ངམ་གསུང༌། འོ་ན་འདིར་ཁྲིད་ལ་ཤོག་གསུང་ནས་གདམས་པ་རྣམས་ཚང་བར་གནང༌། ལོ་ལྔ་འགྲོགས། དེ་ལ་ཡང་སྙན་པ་ཆེ་བས་ཡར་སྲེགས་རྒྱ་དམན་ལ་སོགས་པའི་སྟོན་ཆེན་རྣམས་དང༌། མྱང་སྒོམ་རྒོད་པོ། མྱང་སྒོམ་དཀར་པོ། མྱང་སྒོམ་ཞིག་པོ་ཆོས་ཤེ་སྟེ། མྱང་སྒོམ་མཆེད་གསུམ་པ་མང་དུ་བྱུང་ངོ༌། རྔུལ་སྟོན་གྱིས་ཀྱང་གདམས་ངག་མང་དུ་མཁྱེན་པ་ཞིག་ཁ་རག་པ་དང་མཇལ་བས་སྟོན་པ་དེས་ཆོས་བྱས་ན་འོང་བར་འདུག་གསུང་བ་ཐོས་ནས། ངས་ཆོས་མང་དུ་ཤེས་པ་ལ་དེ་འདྲ་གསུང་བ་ཅི་ཡིན་སྙམ་པ་ལ། ཕྱིས་སྐོར་གསུམ་གྱིི་གདམས་པ་ཞུས་ནས་ཉམས་སུ་བླངས་པས་གསུང་དེ་བདེན་པར་གོ་སྟེ། ཁ་རག་ནས་ཡར་འབྲོག་ལ་བྱོན་ནོ། དེ་ལྟར་ན་གདམས་པའི་ཆུ་བོ་ཅིག་ནི་ཇོ་བོ་རྗེའི་གདམས་པ་རྭ་སྒྲེང་ནས་བབ་པ་དེ་ཡིན་ཏེ། ཁ་རག་པས་དེ་གཉིས་བསྲེས་ནས་བྱང་ཆུབ་སེམས་སྦྱོང་ཞེས་བྱ་བར་མཚན་གསོལ། ཁ་རག་སྐོར་གསུམ་དུ་ཡང་