[A:1189]ལ་བཤད། ཡང་པཎྜི་ཏ་ཆོས་སྟོན་ཞེས་བྱ་བ་ཞིག་གིས་ཁ་སརྦ་ཎིར་འཕགས་པ་ལ་མཆོད་པ་བྱས་པས་རྨི་ལམ་དུ་ཆོས་གསུངས། ཕྱིས་མངོན་སུམ་དུ་ཡང་ཆོས་བསྟན། དེས་པཎྜི་ཏ་དོན་ཡོད་རྡོ་རྗེ་ལ་གསུངས། དེས་བ་རི་ལ་བསྟན་ཏེ། བ་རི་ནི་འཁྲུངས་ཡུལ་ཁམས་པ་སྡོམ་ཚང༌། ལྕགས་ཕོ་འབྲུག་ལ་འཁྲུངས། ལོ་འདི་ལ་རྗེ་བཙུན་མི་ལ་ཡང་འཁྲུངས། ཁམས་སུ་ཁ་ཆེའི་པཎྜི་ཏ་ཅིག་བྱོན་པས་མངོན་པ་དང་ཞལ་གཉིས་མ་ཆུང་བ་གསན། རྒྱ་གར་དུ་འབྱོན་བཞེད་པས་གསེར་སྲང་བདུན་ཅུ་ལྷག་ཅིག་རྙེད་པ་ཁྱེར་ནས་དབུས་སུ་བྱོན་པས། ལོ་བཅོ་ལྔ་ལོན་པ་ལ་ཇོ་བོ་རྗེ་དང་སྙེ་ཐང་དུ་མཇལ། བྱིན་བརླབས་ཞུས་པས་རྡོ་རྗེ་གདན་པའི་སར་སོང་ཞིག་བར་ཆད་མི་འོང་གསུང་ནས་ལུང་བསྟན། ལ་སྟོད་དཔལ་ཐང་ལ་བྱོན་པས་བཤས་ལུག་བརྒྱ་ཙམ་དེད་བྱུང་བས། སྙིང་རྗེ་སྐྱེས་བྱུང་བས་གསེར་ཞོ་རེས་བླུས་ནས་གནས་གཞི་ཅིག་ཏུ་ཚེ་ཐར་དུ་ཕུལ། བལ་པོར་ཕེབས་ནས་རྒྱ་གར་དུ་འགྲོ་བ་ལ་འཇིགས་པ་དང་བཅས་ཤིང་ལམ་ཐག་ཐུང་བ་དང༌། འཇིགས་པ་མེད་ཅིང་ལམ་ཐག་རིང་བ་གཉིས་ཡོད་པ་ལས། ལམ་ཐག་ཉེ་བ་ལ་འཇིགས་པ་མི་འོང་བའི་ཡིད་དམ་གྱི་ལུང་བསྟན་བྱུང༌། སང་གངྒཱ་བརྒལ་བའི་དོ་ནུབ་རྨི་ལམ་དུ་སྤྱན་རས་གཟིགས་ཕྱག་བཞི་པ་ཅིག་གཟིགས། ཀོ་ས་ལ་གྲ་མར་ཙ་མི་དང་མཇལ། གསེར་ཞོ་རེའི་ཕྱག་རྟེན་ལན་གཉིས་སུ་ཕུལ། ཁོང་གིས་བི་ཤྭ་ཀརྨས་བཟོས། སངས་རྒྱས་ཀྱིས་རབ་གནས་གནང་བའི་སྐུ་གཅིག་བསྟན་བྱུང་བས་རྨི་ལམ་དང་མཐུན་པར་བྱུང༌། དེ་མཐོང་