[A:1210]ཐེལ་བའི་རབ་བྱུང་ཡང་ཡིན། ཤར་བྲག་ཏུ་མི་ཏྲ་དང་མཇལ། སྒམ་པོར་ལྷ་རྗེ་དང་མཇལ། འོལ་ཁར་མི་ལ་དང་མཇལ། བདུན་ཅུ་རྩ་གྲངས་ལ་འོན་གྱི་མཚོ་ཕྱི་མན་ཁུང་དུ་གྲོངས་སོ། དེས་སངས་རྒྱས་རི་པ་ལ་གནང་སྟེ། འཁྲུངས་ཡུལ་ཡར་ཀླུངས་པ། ཉི་ཤུ་ཙམ་ལ་སྤྱན་སྔ་ཚེས་བཞི་པ་དང་མཇལ། བླ་མ་བཟང་དགུ་བསྟེན། འཁོར་བ་རྒྱུན་གཅོད་གསན། ཏི་སེར་རྡོར་འཛིན་ལོ་ལྔ་མཛད། དཔོན་པོ་དཔལ་ལྡན་གྲགས་དང་སྟོད་ཧོར་གྱི་བླ་མ་དང་ཏི་ཤྲཱི་ཐོབ། ཀོང་པོར་བྱོན་ནས་ཤར་དགོན་པར་འཁོར་བ་རྒྱུན་གཅོད་གྱི་ཉམས་ལེན་མཛད། འོན་དུ་སྦེར་རྩེ་མོ་ལ་དགོན་པ་བཏབ་སྟེ་དཔལ་རིིར་མིང་བཏགས། ཡི་དམ་མང་པོ་ཞལ་གཟིགས། བདུན་ཅུ་རྩ་དགུ་ལ་གཤེགས་ནས་གཙང་དུ་འཁྲུངས་སོ། དེས་སྤྲུལ་སྐུ་བློ་ལྡན་ལ་གནང་སྟེ། ཡར་ཀླུངས་རྣམ་རྒྱལ་དུ་འཁྲུངས་ནས་གཞོན་ནུ་ནས་ཚེས་བཞི་གསར་མ་བ་ལ་རབ་ཏུ་བྱུང༌། ཉི་ཤུ་ཙམ་ནས་ཕྱག་རྡོར་གྲུབ། ཉི་ཤུ་ནས་ཉི་ཤུ་རྩ་བཞིའི་བར་དུ་གཞན་ཕན་མཛད་དེ་ལྕང་ལོ་ཅན་དུ་གཤེགས་སོ། དེས་བླ་མ་བདག་པ་ལ་གནང་སྟེ། གདུང་ཤུད་ཡིན། སྔགས་པའི་བུར་སྐྱེས། དད་པ་ཆེ་བས་ཀརྨ་པ་ལས་མ་ཎི་དུང་ཕྱུར་བླངས། ཉི་ཤུའི་བར་དུ་ཁྱིམ་པ་བྱས། ཉི་ཤུ་ནས་ལྔ་བཅུའི་བར་ལ་རི་ཁྲོད་འགྲིམས་ཤིང་སྒྲུབ་པ་བྱས་ཏེ་ཉེར་གཉིས་ལ་ཀུན་སྤངས་པ་ལ་རབ་ཏུ་བྱུང༌། སོ་ལྔ་པ་ལ་མཁན་ཆེན་བྲས་སེང་བ་ལས་བསྙེན་པར་རྫོགས། རྫོགས་ཆེན་ལ་སོགས་ཁྲིད་ཁ་བརྒྱ་ཙམ་ཐོབ། ཆུ་བར་ལ་སོགས་རི་ཁྲོད་བརྒྱ་ཙམ་འགྲིམས།