[A:1218]འཁོར་གྱི་ཆོ་ག་མང་པོ་བརྩམས་ན་མྱུར་དུ་སྐལ་བ་ཅན་དུ་འགྱུར་རོ་ཞེས་པའི་གསུང་ལ་བརྟེན་ནས་མན་ངག་གི་སྙེ་མ་དང༌། མི་འཇིགས་པའི་གཞུང་འགྲེལ་བརྩམས་ཤིང༌། དཀྱིལ་འཁོར་གྱིི་ཆོ་ག་རྡོ་རྗེ་ཕྲེང་བ་ཞེས་བྱ་བ་འདི་མཛད་དོ། འདི་ལ་ཡང་ཁ་ཆེའི་པཎྜི་ཏ་ཆེན་པོ་བོད་དུ་བྱོན་པའི་དུས་སུ་རྡོ་རྗེ་ཕྲེང་བའི་དབང་བསྐུར་ལན་གསུམ་མཛད་པ་ལ་སྔ་མ་གཉིས་ཐམས་ཅད་བླ་མེད་ཀྱི་ཚོགས་མཛད། ཕྱི་མ་ལ་བོད་རྣམས་རྟོག་པ་ཆེ་བས་རྒྱུད་སྡེ་སོ་སོར་མ་ཕྱེ་ན་དབང་མི་ཐོབ་པ་འདྲ་ཞེས་གསུངས་ནས་རྒྱུད་སྡེ་ཕྱེ་ནས་དབང་བསྐུར་རོ་ཞེས་གྲགས། ཆག་ལོ་ཙཱ་བ་ཆོས་རྗེ་དཔལ་གྱིས་རེ་བེནྡྲ་བ་ལས་གསན་ནས་དཀྱིལ་འཁོར་ཉི་ཤུ་རྩ་བརྒྱད་ཀྱི་དབང་བསྐུར་བས་གཞན་ཐམས་ཅད་ཀྱང་ཐོབ་པར་བཞེད། ལོ་ཙཱ་བ་གྲགས་པ་རྒྱལ་མཚན་གྱིས་ཁ་ཆེའི་པཎྜི་ཏ་ཆེན་པོ་བྷཱུ་མི་ཤྲཱི་ལས་གསན་ནས་དཀྱིལ་འཁོར་བཞི་བཅུ་རྩ་ལྔར་ཕྱེ་སྟེ་དབང་བསྐུར། རྒྱ་གར་ཤར་ཕྱོགས་ཀྱི་པཎྜི་ཏ་ཆེན་པོ་དཔལ་ནགས་ཀྱི་རིན་ཆེན་གྱི་ཞལ་སྔ་ནས་རྒྱལ་པོའི་ཕོ་བྲང་སྣེའུ་གདོང་དུ་རྡོ་རྗེ་ཕྲེང་བའི་དབང་ཚར་གཉིས་མཛད་པ་ལ། ཐམས་ཅད་གསང་སྔགས་བླ་ན་མེད་པའི་ལུགས་སུ་དབང་བསྐུར། འགའ་ཞིག་གིས་རྒྱུད་སྡེ་སོ་སོར་ཕྱེ་ནས་དབང་བསྐུར་ན་མི་ལེགས་སམ་ཞུས་པས། སོ་སོར་ཕྱེ་ན་ལེགས་པོ་འོང་གསུང༌། འོ་ན་ད་ལན་དེ་ལྟར་མི་མཛད་པ་ཅི་ཡིན་ཞུས་པ་ནི། ད་ལན་ཁྱེད་རྣམས་ལ་ཨ་བྷ་ཡའི་ལུགས་ཀྱི་དབང་བསྐུར་བ་ཡིན་མོད། ཨ་བྷ་ཡས་ནི་རྒྱུད་སྡེ་སོ་སོར་མ་ཕྱེ་ཞེས་གསུང༌། ཕྲེང་བ་འདི་ལ་ལོ་ཙཱ་བ་མང་པོས་སོ་སོར་འགྱུར་མཛད་