[A:1226]དྲངས་ནས་ཨ་ལངྐ་དེ་བ་གཉིས་ཀྱིས་བསྒྱུར་བ་ལས་སུམ་གཉིས་ཙམ་འགྱུར་བ་ན་པཎྜི་ཏ་སྐུ་གཤེགས། གཤེགས་འདབ་ལ་ཆོས་ཁྲི་བཞི་བཅུ་རྩ་བརྒྱད་ཙམ་བརྩིགས་པའི་ཆོས་འཁོར་ཆེ་བ་ཅིག་མཛད། སྤྱིར་བདེ་མཆོག་དྲུག་ཅུ་རྩ་གཉིས་ཀྱི་དཀྱིལ་འཁོར་དང་ཆོས་སྐྱོང་མང་པོའི་ཞལ་མངོན་སུམ་དུ་གཟིགས། གྲོ་ལུང་བ་ཆེན་པོ་ལ་སོགས་པའི་མཁས་པ་ཆེ་དགུས་ཞབས་ལ་གཏུགས་ནས་བསྟན་པའི་བདག་པོར་གྱུར་ནས་དགུང་ལོ་བརྒྱད་ཅུ་རྩ་བཞི་པ་ལྕགས་ཕོ་ཁྱིའི་ལོ་ལ་གཤེགས། དེའི་ཚེ་ལོ་ཙཱ་བ་ཆེན་པོ་བློ་ལྡན་ཤེས་རབ་གཤེགས་ནས་ལོ་བརྒྱད་ཅུ་རྩ་གཉིས་སོང༌། རྟེན་རིང་བསྲེལ་ཡང་མང་དུ་བྱོན་ནོ། དེའི་སློབ་མ་ཆག་དགྲ་བཅོམ་ནི། སྟེངས་པ་ལོ་ཙཱ་བའི་བཞི་བཅུ་རྩ་བདུན་པ་ཆུ་མོ་བྱ་ལ་མེས་བཀྲ་ཤིས་དགའི་སྲས་སུ་གནས་ཆག་གྲོང་དུ་སྐུ་འཁྲུངས། གུ་རུ་བ་ཆག་སྟོན་ཆེན་པོ་མཚན་རིན་ཆེན་ཚུལ་ཁྲིམས་ཤེས་བྱ་བ་གྲོ་ལུང་བའི་དངོས་སློབ་དེ་ལས་རབ་ཏུ་བྱུང༌། སྟེངས་པ་ལོ་ཙཱ་བ་ལ་སྒྲ་དང་ལོ་ཙཱ་བསླབས། གསང་འདུས་འཕགས་སྐོར་དང་དུས་འཁོར་ལ་སོགས་གསན། ཆོས་སྐྱོང་ཕྱག་བཞི་པ་ཞུས་པས་ཕྱི་བཞིན་དུ་འབྲང་བ་བྱུང༌། བྱང་སེམས་ཟླ་རྒྱལ་གྱི་སློབ་མ་མལ་གྲོ་འདུལ་འཛིན། དེའི་སློབ་མ་མཁན་པོ་དར་བརྩོན་ལས་བསྙེན་པར་རྫོགས། གཙང་དུ་བཤེས་གཉེན་ཤཱཀ་གྲུབ། གཙང་དཀར། ཅོག་གྲུ་ལོ་ཙཱ་བ་མྱང་ངན་མེད་པའི་དཔལ། ཞང་ལོ་ཙཱ་བ་ལ་སོགས་པའི་བོད་ཀྱི་བླ་མ་བཅོ་ལྔ་བརྟེན། རྒྱ་གར་དུ་འབྱོན་པའི་བར་ཆད་ཞི་བའི་ཕྱིར་ཁ་སརྦ་ཎི་བསྒྲུབས་པས་མཚན་མ་