[A:1230]ལམ་དུ་རྡོ་རྗེ་གདན་ཇི་ལྟ་བ་བཞིན་དུ་གཟིགས། དེ་ནས་རྡོ་རྗེ་གདན་དུ་བྱོན་པས་མི་གཅིག་ཀྱང་མི་འདུག་སྟེ། ཏུ་རུ་ཥྐའི་དམག་གིས་ཉེན་བྲོས་པས་བྱང་ཆུབ་ཆེན་པོ་ཡུན་རིང་དུ་མ་མཇལ། དེ་ནས་མཇལ་ཏེ་མ་ཧཱ་བོ་དྷི་ལ་མཆོད་པ་ཕུལ། གནས་ཀྱི་བཀོད་པ་ཞིབ་ཏུ་གཟིགས། ནཱ་ལནྡྷར་པཎྜི་ཏ་རཱ་ཧུ་ལ་ཤྲཱི་བྷ་དྲ་དང་མཇལ་ཆོས་མང་དུ་གསན། གར་ལོག་གི་དམག་བྱུང་བས་ཡུལ་མི་རྒྱལ་པོ་དང་བཅས་པ་ཐམས་ཅད་ཀྱང་བྲོས། རཱ་ཧུ་ལའི་ཞལ་ནས་ང་ལོ་དགུ་བཅུ་ལོན་པས་འབྲོས་སུ་མེད་པ་ཡིན་མོད། ཁྱོད་མི་འབྲོས་པ་གླེན་གསུང་པ་ལ། ང་བསད་ཀྱང་བླ་མའི་དྲུང་ལས་གཞན་དུ་མི་འགྲོ་བྱས་པས། དམ་ཚིག་ཅན་དུ་དགོངས་ནས་གཏིང་ནས་མཉེས། དེ་ནས་བླ་མ་ཁུར་ནས་གར་ལོག་གི་དམག་རྣམས་གཉན་པོར་ལྟ་བའི་མགོན་པོའི་ལྷ་ཁང་དུ་གདན་དྲངས་པས་གར་ལོག་གི་གནོད་པ་ཡང་མ་བྱུང༌། མ་ག་དྷར་ཚད་པའི་ནད་བྱུང་བ་འཐོན་ནས་ཤུ་བར་སོང༌། སླར་ཏིར་ཧུ་ཏིར་ཡང་ཚད་པས་ཟིན། དེ་ནས་དལ་གྱི་བོད་དུ་ཕེབས། སྤྱིར་པཎྜི་ཏ་ཆེན་པོ་བཅུ་གཉིས། བོད་ཀྱི་ལོ་ཙཱ་བ་བཞི། མཁས་བཙུན་ཉི་ཤུ་རྩ་གཅིག་ལ་སོགས་པ་ལ་ཆོས་གསན། ས་སྐྱ་པཎ་ཆེན་གྱིས་ལོ་ཙཱ་བ་རིན་ཆེན་བཟང་པོའི་འོག་ན་ལོ་ཙཱ་བ་ཁྱེད་མཁས་ཤེས་བསྔགས། ནག་ཚོ་ལོ་ཙཱ་བའི་གདན་ས་ཡང་ཐོག་ཏུ་ནན་གྱིས་ཞུ་བ་ཕུལ་བས་ལོ་བཞི་བཞུགས། ཧ་རི་མཎྡྲ་ལ་སོགས་པའི་གནས་གཞི་བརྒྱད་ཅུ་ཐམ་པའི་ལྡེ་མིག་དང་གསུང་རབ་པོ་ཏི་ཉིས་བརྒྱ་ཙམ་ཕྱག་ཏུ་བྱུང༌། དེ་ནས་རྟེའུ་རར་ཕེབས། ཕྱིས་དྲུག་ཅུ་