[A:1245]བླ་མ་གོང་མས་མཁྱེན་ཡང་མ་དད་པས་ངས་ལྷའི་ངོ་བསྟན་གདམས་པ་བྱས་ན་ཕྱིས་རྟོགས་ལྡན་མང་པོ་འབྱུང་གསུངས། ལྷ་གསུམ་ནི་བདེ་མཆོག་ཡབ་ཡུམ་གོ་བཟློག ཤཱཀྱ་ཐུབ་པ་སྤྲུལ་སྐུ་ལ་ཡུམ་རྡོ་རྗེ་མཁའ་འགྲོ་ཡོད་པ། རྡོ་རྗེ་དྲིལ་བུ་མཉམ་སྦྱོར་གྱི་ལྷ་རྣམས་སོ། སྲིན་པོ་རིར་དབྱར་གནས་མཛད། མངོན་པ་ཀུན་ལས་བཏུས་ཀྱི་རྣམ་བཤད་སློབ་དཔོན་ཡེ་ཤེས་བཤེས་གཉེན་གྱིས་མཛད་པ་བསྒྱུར། སྤྱི་ཆོས་སུ་མྱ་ངན་མེད་ལུང་བསྟན་པའི་མདོ། དཔེ་བརྒྱ་པ། ལས་ཀྱི་འཁོར་ལོ་བསྟན་པ་རྣམས་གསུངས། བྱམས་ཆོས་ལྔའི་རྣམ་བཞག་དང་དབུ་མ་རིགས་ཚོགས་རྣམས། བྱམས་ཆོས་ལྔའི་ཁྲིད་སྐོར་རྣམས་སྲིན་པོ་རི་བའི་གདན་ས་བས་ཞུས་ནས་གནང༌། གཉལ་ཟངས་པོ་ཆེ་བ་སོགས་ཀྱིས་རྒྱལ་སྲས་ལམ་རིམ་གྱི་ཁྲིད་བསྐྱངས། དེ་ནས་བསམ་ཡས་སུ་ལྷ་ཞི་བ་འོད་ཀྱིས་སྤྱན་དྲངས་ནས་བསམ་ཡས་དང་འཆིམས་ཕུ་སོགས་སུ་བྱོན། དེར་དབོན་སྟོན་རིན་ཆེན་སྒང་བས་ཀྱང་མཇལ། དེ་ནས་སྲིན་པོ་རིར་ཕེབས་པའི་ཚེ་འཚུར་ཕུ་བ། རྒྱ་མ་བ། འབྲི་ཁུང་བ་རྣམས་ཀྱིས་གདན་འདྲེན་བྱུང་བས་འབྲི་ཁུང་བ་དང་མཇལ་བའི་རྟེན་འབྲེལ་སྔ་ཕྱིར་མ་འགྲིག རྒྱ་མ་རིན་ཆེན་སྒང་དུ་ལན་གཉིས་དང་རྭ་སྒྲེང་དུ་བྱོན། དེ་ནས་གཉལ་དང་ལོ་རོ་དང་ལྷོ་བྲག་ལ་སོགས་པ་རྣམས་སུ་བྱོན། བུ་གུ་དོ་དང་ཐང་པོ་ཆེར་བྱོན་ཅིང་ཁྱད་པར་ཐང་པོ་ཆེར་ཡུན་རིང་དུ་བཞུགས་ནས་ཆོས་མང་དུ་གསུངས། དེ་ཡན་ཆོད་དུ་ལོ་ཙཱ་བའི་སྣོད་རྟོག་པའི་ཆེད་དུ་རྫས་ལ་འཛིན་པ་ཆེ་ཆེ་ལྟར་མཛད་པ་ལས། དེ་ནས་རྫས་དངོས་བྱུང་བ་ཕལ་ཆེར་ཁྲོ་ཕུའི་བྱམས་པ་ལ་