[A:1272]
དྲི་མེད་རྒྱལ་བའི་བསྟན་པ་རིན་པོ་ཆེ། །
དམ་པ་དམ་པའི་ཕྱག་ལས་ལེགས་བརྒྱུད་པ། །
དེ་འདིར་ཡི་གེའི་སྲད་བུ་ལ་བཀོད་དེ། །
ཤེས་རབ་མིག་ལྡན་སྐྱེ་བོས་ལྟ་ཆེད་དུའོ། །
དགེ་བ་འདི་ཡིས་ལུས་པ་མེད་པའི་ལུས་ཅན་གྱིས། །
རྒྱལ་བའི་བསྟན་པ་བདུད་རྩིའི་རྒྱུན་དག་རབ་འཐུངས་ནས། །
ཡོན་ཏན་ཀུན་གཏེར་ཐམས་ཅད་མཁྱེན་པའི་རིན་པོ་ཆེས། །
རྒྱུན་མི་འཆད་པའི་ཕྲིན་ལས་དམ་པ་འཇུག་གྱུར་ཅིག །
ཇི་ལྟར་རྡོ་ཤིང་འཇིམ་པ་ལས་བསྒྲུབས་ཀྱང༌། །
ཐུབ་པའི་སྐུ་མཚུངས་དེ་ནི་མཆོད་བྱ་བཞིན། །
ཐུབ་བསྟན་སྙིགས་ཏེ་གཟུགས་བརྙན་ཙམ་ཞིག་ཏུ། །
གྱུར་ཀྱང་སྐྱེ་བོ་ཀུན་གྱིས་མཆོད་བྱ་ཉིད། །
བོད་ཀྱི་ཡུལ་དུ་ཆོས་དང་ཆོས་སྨྲ་བ་ཇི་ལྟར་བྱུང་བའི་རིམ་པ་འདི་ནི། ཆོས་ཀྱི་རྒྱལ་པོ་སྲོང་བཙན་འཁྲུངས་ནས་ལོ་བརྒྱད་བརྒྱ་དང་ལྔ་བཅུ་པ་ལ་བབ་པས་ས་ཕོ་ཁྱིའི་ལོ་ལ། དཔལ་ཀུན་ཏུ་བཟང་པོའི་ནགས་འདབ་རང་བྱུང་བདུད་རྩིའི་རྒྱུན་ཅན་མངོན་པར་དགའ་བའི་ཆོས་རྫོང་དུ་ཆོས་སྨྲ་བའི་བཙུན་པ་གཞོན་ནུ་དཔལ་ཞེས་བྱ་བས་ཉེ་བར་སྦྱར་བའོ།
[འདིས་ཀྱང་རྒྱལ་བའི་བསྟན་པ་རིན་པོ་ཆེ་སྒོ་མཐའ་དག་ནས་ཕྱོགས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག