[A:136]དགྱེས་ཤིང་དེ་ནས་ལུང་ཅི་འདྲོངས་མཛད་པ་ཡིན་ནོ། །བོད་འདིར་རྡོ་རྗེ་ཕུར་བུའི་སྒྲུབ་པ་ནི་ཤིན་ཏུ་དར་ལ། དེ་ལ་ཡང་ཁ་ཟེར་བ་དག་ཡོད་མོད་ཀྱི། དུས་ཕྱིས་ཆོས་རྗེ་ས་སྐྱ་པས་ཤངས་སྲེག་ཞིང་ནས་སློབ་དཔོན་པདྨ་དངོས་ཀྱི་ཕྱག་དཔེའི་རྒྱ་དཔེ་རྙེད་ནས་འགྱུར་མཛད་པས་ཐམས་ཅད་ཁ་རོག་སྟེ་འདུག་གོ ཁ་ཆེ་པཎ་ཆེན་གྱིས་བསམ་ཡས་སུ་བྱོན་པའི་ཚེ་གསང་བ་སྙིང་པོའི་རྒྱ་དཔེ་རྙེད། ཕྱིས་དེ་རྟ་སྟོན་གཟི་བརྗིད་ཀྱི་ལག་ཏུ་བྱུང་ནས། ཁོང་གིས་ཤ་གང་ལོ་ཙཱ་བ་ལ་ཕུལ། དེས་བཅོམ་ལྡན་རལ་གྲི་ལ་བསྐུར་ནས། བཅོམ་ལྡན་རལ་གྲིས་ཐུགས་ཆེས་ཏེ་གསང་སྙིང་སྒྲུབ་པ་རྒྱན་གྱི་མེ་ཏོག་མཛད། མ་མོ་གནས་སུ་སྔགས་པ་འདུས་པ་ལ་རྒྱ་དཔེ་བསྟན་ནས་ཆེ་བ་བརྗོད། སླད་ཀྱིས་ཐར་པ་ལོ་ཙཱ་བས་སྔོན་མ་བྱུང་བའི་གསང་སྙིང་རྒྱུད་ཕྱི་མ་དང་བཅས་པ་ལ་འགྱུར་མཛད་དེ། དཔེ་དའི་སྟེང་ནས་མང་རབ་ཅིག་ཟགས་པའི་ལྷག་མའི་རྒྱ་དཔེ་ནི་ཁོ་བོའི་ལག་ན་མཆིས་སོ།
།དེ་ལ་ཁྲི་སྲོང་ལྡེ་བཙན་ཡབ་སྲས་ཀྱི་རིང་ལ། རྡོ་རྗེའི་ཐེག་པ་ལ་བརྟེན་ནས་གྲུབ་པ་བརྙེས་པ་མང་དུ་བྱུང་བ་འདི་ལྟ་སྟེ། འབྲེལ་དཔལ་གྱི་བློ་གྲོས། སྣ་ནམ་རྡོ་རྗེ་བདུད་འཇོམས། ངན་ལམ་རྒྱལ་མཆོག་དབྱངས། ཨུ་ན་ཨ་ནང་ག སྣུབས་ནམ་མཁའ་སྙིང་པོ། ཀླང་དཔལ་གྱི་སེང་གེ། གླང་གཙུག་གི་རིན་ཆེན། འབྲེ་རྒྱལ་བའི་བློ་གྲོས། ཁམས་པ་གོ་ཆ། བཻ་རོ་ཙ་ན། རྨ་རིན་ཆེན་མཆོག གཉགས་ཛྙཱ་ན་ཀུ་མཱ་ར། གཉན་དཔལ་དབྱངས་ལ་སོགས་པ་ནམ་མཁའ་ལ་འགྲོ་བ་དང༌། རི་བྲག་ལ་འཛུལ་བ། ཆུ་ལ་མི་འབྱིང་བ་དང༌། ལུས་ལྷའི་དཀྱིལ་འཁོར་དུ་སྐྱེ་བོ་མང་པོ་ལ་སྟོན་ནུས་པ་དུ་མ་དང༌། གཞན་