[A:158]སྒྲོ་ཕུག་པ་ཤིང་ཕོ་སྟག་ལ་འཁྲུངས་སོ། ཡབ་ཀྱི་ཞལ་ནས། སྐྱོ་སྟོན་ཤཱཀ་ཡེས་ཀྱི་རྨི་ལྟས་ཀྱང་བཟང༌། ངའི་བུ་འདི་བསྟན་པའི་གཙོ་བོ་དང་ཚུལ་མཐུན་པ་འགྲོ་བ་ལ་ཕན་ཐོགས་པ་ཅིག་འོང་བར་འདུག་པས། མིང་ཡང་ཤཱཀྱ་སེང་གེར་ཐོགས་གསུང༌། ཡུམ་གྱི་ཞལ་ནས། མི་རྩ་གྲུང་ཧོར་པའི་མིག་འདྲ་བས་ཤིན་ཏུ་གྲུང་བ་ཅིག་འོང་བར་འདུག་པས། མིང་ཧོར་པོར་ཐོགས་གསུང༌། དེ་ལྟར་ཟུར་ཤཱཀྱ་སེང་གེ་དང་མདའ་ཚ་ཧོར་པོར་གྲགས། དེ་ཡང་འཁྲུངས་དུས་སུ་ཡབ་ཀྱིས་སྤོང་ཐག་བྱས་ནས་ཅི་ཡང་མེད་པའི་དུས་གཅིག་དང་ཐུག་པས། ཡུམ་ན་རེ། ཁ་ནིང་ནས་བུ་འདི་སྐྱེ་བའི་རྒྱུད་ནི་ཡོད། རྐན་མར་ཙམ་ཞིག་མི་འཇོག་པ་ད་སྦྱིན་རྒྱུ་མེད་ཟེར་བས། རུའི་ཞལ་ནས། ཁོང་རང་ལ་བསོད་ནམས་ཤིག་ཡོད་ན་ངས་མ་བཞག་ཀྱང་འོང༌། བསོད་ནམས་མེད་ན་ངས་བཞག་ཀྱང་ཕན་མི་ཐོགས་གསུང་ནས་ཁང་ཐོག་ན་བཞུགས་འདུག་ཙ་ན། བཙུན་མ་མོ་ཅིག་གིས་ནས་བོང་རྒྱབ་བརྒྱ་དང་མར་ཁལ་བརྒྱ་འབུལ་དུ་བྱུང་བས། རུའི་ཞལ་ནས། རྐན་མར་བྱུང་ངོ་གསུང་སྐད། དེ་ནས་འདི་ལ་བསོད་ནམས་ཅན་འགྲོ་བ་ལ་ཕན་ཐོགས་པ་ཅིག་འོང་བར་འདུག་གསུང་ནས་དགྱེས་སོ།
།དེའི་སྲས་ཇོ་བཙུན་རྡོ་རྗེ་གྲགས། སྲས་མོ་རྡོ་རྗེ་ལྕམ་མོ། ཇོ་བཙུན་རྡོ་རྗེ་གྲགས་པ་ལ་སྲས་ལྔ། རྣལ་འབྱོར། རྒྱལ་ཚབ། ཅུང་ངེ། འཁྱམ་མ། བྲག་གེའོ། །ལྷ་རྗེ་རྣལ་འབྱོར་ལ་སྲས་གཉིས། སྲེགས་ཚ་དང་སྣོད་ཚའོ། །རྒྱལ་ཚབ་ཀྱི་སྲས་ཇོ་བཙུན་ཀུན་དགའ་སྙིང་པོ། ཅུང་ངེའི་སྲས་རྒྱལ་ཚའོ། །སྲས་སྔ་