[A:160]མཛད་པས། སྐུ་བསོད་ཆེན་པོ་རྒྱས་ཏེ་སློབ་གཉེར་གྱི་འཕྲོ་བྱེད་པའི་སྐབས་མ་བྱུང་བ་ལ། སྐབས་བཙལ་ནས་གོང་བུར་སྐྱོའི་རྩར་ལོ་གཅིག་བྱོན། དེ་ནས་སྐུ་བསོད་རྒྱས་པས་གཞན་དུ་བཞུད་པའི་སྐབས་མ་བྱུང་ནས། བླ་མ་མཁས་པ་དག་ཚུར་ལ་སྤྱན་དྲངས་ཤིང༌། གོ་འདེགས་མཛད་ནས་སློབ་གཉེར་རྣམས་རྫོགས་པར་མཛད་དེ། དེ་ཡང་ཀ་བ་བཞི་ལ་མདོ་སྒྱུ་འཕྲུལ་སེམས་ཕྱོགས་གསུམ་གྱི་རྒྱུད་མན་ངག་ཕྲིན་སྒྲུབ་ཕྱག་བཞེས་དང་བཅས་པ་གསན་ཞིང༌། དབང་རྣམས་རྫོགས་པར་ཞུས། གླན་ཤཱཀྱ་བྱང་ཆུབ་ལ་རྫོགས་ཆེན་སྐོར་ལུགས་གསན། ལྷ་རྗེ་ཤངས་པ་ནག་པོ་ལ་རྫོགས་ཆེན་བརྒྱུད་པ་ཐ་མའི་སྐོར་རྒྱུད་གདམས་ངག་དང་བཅས་པ་གསན། དེ་ལྟར་མཁས་པ་མང་པོ་ལ་གསན་ནས་ཐོས་བསམ་གྱིས་སྒྲོ་འདོགས་ཆོད་པར་མཛད་པ་ལགས། སྤྱིར་ལྷ་རྗེ་སྒྲོ་སྦུག་པ་ནི་གསང་བདག་ཕྱག་ན་རྡོ་རྗེའི་སྤྲུལ་པ་ཡིན་ནོ་ཞེས་གྲགས་ལ། བྱང་ཕྱོགས་ཀྱི་རྒྱུད་འདིར་གསང་སྔགས་ཀྱི་བསྟན་པ་རྒྱས་པར་མཛད་པ་ལ་བྱོན་ནས། གདུལ་བྱའི་ཚོགས་བསམ་གྱིས་མི་ཁྱབ་པ་ལ་ཆོས་ཀྱི་འཁོར་ལོ་བསྐོར། སློབ་མ་དགེ་བའི་བཤེས་གཉེན་ཆེན་པོ་གྲྭ་ས་འཛིན་ཞིང་བསྟན་པ་སྐྱོང་བ་གདུགས་ཐོགས་སྟོང་ཐོན་ནས། གསང་སྔགས་ཀྱི་བསྟན་པ་དར་ཞིང་རྒྱས་པར་མཛད་དེ། ཉི་ཟླ་ལྟར་གྲགས་པ་ཡིན་ནོ། །དེ་དག་གི་ནང་ནས་ཀྱང་ཐུགས་ཟིན་པའི་སློབ་མ་བཞི་གསུམ་བཅུ་གཉིས་བྱུང་བ་ལ། མེ་བཞི་ནི། དཔང་སྟོན་ལྕགས་ཀྱུ། ཤབ་རྩེ་གསེར་པ། བྱ་སྟོན་རྡོ་རྗེ་གྲགས། གཡུ་སྟོན་ནོ། །ནག་བཞི་ནི། ལྕེ་སྟོན་རྒྱ་ནག ཟུར་ནག་འཁོར་ལོ། མྱང་