[A:163]འདུག་སྟེ། འདི་འདྲ་འོང་བ་ཇི་ལྟར་ཡིན། ངས་ཉན་ན་གོ་བར་འདུག་སྟེ་བྱས་པས། ཁོང་གཉིས་ན་རེ། ངེད་ལ་དེ་ལས་མ་བྱུང་ཁྱོད་ཀྱིས་གོ་ན་ཁྱོད་རང་ཉོན། ངེས་ཀྱིས་རྒྱགས་བསྐྱལ་གྱི་ཆོས་ཤེས་ན་སུས་ཤེས་ཀྱང་འདྲ་ཡིས་ཟེར་ནས། དེར་ལྷ་རྗེ་རྒྱ་ནག་གིས་བཞུགས་ནས་ཆོས་གསན་པ་ལ། དེ་ཡང་དགུང་ལོ་ཉི་ཤུ་རྩ་གཅིག་ནས་སློབ་གཉེར་མཛད་དེ་དང་པོར་མཚན་ཉིད་གསན་པ་ལས། དུས་དེའི་ཚེ་ན་མཁས་པར་གྲགས་པ་ཤེ་ཁྱུང་གཉིས། འབན་འབྲེ་གཉིས། རྒྱ་སྟག་གཉིས་བྱ་བ་ཡོད་པའི། ཁྱུང་པོ་གྲགས་སེ་ལ་ཕ་རོལ་ཏུ་ཕྱིན་པ་གསན། འབན་ཐམས་ཅད་མཁྱེན་པ་ལ་མངོན་པ་གསན། སྟག་པ་ཁ་ཆེ་ལ་དབུ་ཚད་གསན། དེ་དག་གི་སྟེང་དུ་འགར་བསོད་ཡེས་ལའང་གསན་ཏེ། དེ་ལྟར་མཚན་ཉིད་ལོ་དགུར་གསན་ནོ། དེ་ནས་ལྷ་རྗེ་ཆེན་པོ་སྒྲོ་ཕུག་པའི་ཞབས་དྲུང་དུ་སྔགས་གསན་དུ་བྱོན་ནས་ལོ་བཅུ་གཅིག་བཞུགས་པ་ལ། ལོ་གསུམ་བར་དུ་ཇོ་སྲས་མྱང་སྟོད་པ་གསུང་བ་ཙམ་ལས། ནན་ཏར་གྱི་ཐུགས་ཕེབས་མོའི་སྤྱན་སྔར་གསུང་གླེང་ཞིབ་མོ་ཙམ་ཡང་མ་བྱུང་བ་ལ། རྒྱ་བརྩོན་སེང་དཔོན་གཡོག་དང་ལྷ་རྗེ་ཆོས་འཁོར་སྟབས་ཤིག་ཏུ་བྱུང་བའི་ཚེ། རྒྱ་བརྩོན་སེང་དཔོན་གཡོག་གིས་རྩོད་པ་བཙུགས་པའི་དུས་སུ། ལྷ་རྗེ་རྒྱ་ནག་གིས་ཁོང་སུན་ཕྱུང་ཞིང་ང་རྒྱལ་བཅག་པ་ལ་དགྱེས་ནས་ཐུགས་ལ་ཤིན་ཏུ་འདོགས་པར་བྱུང་བའི་སྟེང་དུ། སྲས་ཇོ་བཙུན་རྡོ་རྗེ་གྲགས་བློ་ཁ་ཕྱེ་བས་རབ་ཏུ་དགྱེས་ཏེ། དེ་དག་གི་དྲིན་ལན་དུ་བསྐྱེད་རྫོགས་གསུམ་གྱི་གཞུང་གདམས་ངག་ཐམས་ཅད་གནང་ཞིང༌། ཁྱད་པར་གྱི་གདམས་པ་