[A:168]ངམ་ཞུས་པས། ཐོག་གམ་དེ་བྱུང་གསུང༌། འོ་ན་མ་གནོད་དམ་ཞུས་པས་སྒྲ་གྲག་སྟོང་དབྱེར་མེད་ལ་ཐོག་ལ་རང་བཞིན་ག་ལ་ཡོད་གསུང༌། རྣལ་འབྱོར་གྱི་དབང་ཕྱུག་ཆེན་པོ་འདི་ལ་དེ་ལ་སོགས་པའི་ཆེ་བ་ཡོན་ཏན་དུ་མ་ཡོད་དོ། །དེ་ལྟ་བུས་ཁོང་གི་ཁུ་བོ་སློབ་མ་བཟང་པོ་ཡོད་པ་རྣམས་ལ་ཆོས་ཞུས་ཤིང༌། ཐག་ཆོད་པ་མཛད་ནས་གྲྭ་ས་བསྐྱངས་སོ། །སྒོམ་སྒྲུབ་ལ་བཞུགས་ནས་མཚམས་འོག་ནས་གྲྭ་ས་སྐྱོང་བ་ལ་ལོ་བཅོ་བརྒྱད་མཛད་དེ། དགུང་ལོ་བདུན་ཅུ་པ་ཤིང་མོ་ཡོས་ཀྱི་ལོ་ལ་གཤེགས་སོ། །བདག་ཉིད་ཆེན་པོ་དེའི་སློབ་མར་བྱུང་བ་ཞིག་པོ་བདུད་རྩི་དང༌། སྟོན་པ་བླ་སྐྱབས་དང༌། དབུས་པ་ཇོ་བསོད་དང༌། སྙེ་སྟོན་ཉི་མ་རྡོ་རྗེ་ལ་སོགས་པ་གཞུང་ལུགས་སྨྲ་བ་ལ་མཁས་པ་མང་དུ་བྱོན། གཞན་ཡང་ལ་སྟོད་ཀྱི་མེས་སྟོན་མགོན་པོ་དང༌། དཔྱལ་ཀུན་དགའ་རྡོ་རྗེ་ལ་སོགས་པས་ཀྱང་ཆོས་ཞུས་ཞབས་ལ་གཏུགས་སོ།
ཁུ་དབོན་འདི་གཉིས་མཁྱེན་པའི་སྲོལ་སྔ་མས་གཏོད་པ་ཡིན་ཡང༌། གདུལ་བྱ་ལ་ཕན་པའི་བསྟན་པའི་བྱ་བ་ཕྱི་མས་རྒྱ་ཆེར་མཛད་པ་ཡིན་ནོ། ཟུར་ཆུང་པ་འཁྲུངས་ནས་ཡོན་ཏན་གཟུངས་ཤིང་ཡོས་ལ་གཤེགས་པ་ཡན་ཆོད་ལ་ལོ་བརྒྱ་དང་བརྒྱད་ཅུ་རྩ་གཉིས་སོང་ངོ༌། །ལྷ་རྗེ་ལྷ་ཁང་པའི་ཐུགས་ཀྱི་སྲས་དམ་པ་སྤྲུལ་སྐུ་ཞིག་པོ་བདུད་རྩི་ཡིན་ཏེ། དེ་ཡང་མེས་རྡོ་རྗེ་རྒྱལ་མཚན་ཞེས་བྱ་བ་དགེ་བའི་བཤེས་གཉེན་ཞིག་ཡོད་པ་ལ། སྲས་སྟོན་པ་འཁང་རེ་དང་འཁར་ཆུང་ཞེས་བྱ་བ་ཡོ་ག་ལ་མཁས་པ་ཞིག་ཡོད་པ་ལ། དེའི་འཁར་ཆུང་གི་སྲས་ཤུ་སྟོན་མོན་སྲས་བྱ་བ་དེ་ཡང་ཕྱི་རྒྱུད་ལ་