[A:219]ཁུ་འགྱུར་གསལ་བ་མཆོག་ལོ་བརྒྱ་དང་བཅུ་བདུན་ལོན་ནས་ལྷག་མེད་དུ་གཤེགས་ཏེ། དེ་གསུམ་ཀ་ཝ་སེང་གེ་བྲག་ལ་སྦྲུལ་ལོ་ལ་གཅིག་རྟིང་ལ་གཅིག་གཤེགས་ཏེ། སྐུ་ན་བུན་ཡལ་བའམ་འཇའ་ཡལ་བ་བཞིན་དུ་གཤེགས་སོ།
།དེའི་སློབ་མ་མྱང་བྱང་ཆུབ་གྲགས་ནི། ཡུལ་མྱང་གཡུ་འབྲུག་སྟོད་པ་དགེ་སློང་ལོ་བཞི་བཅུ་རྩ་གཉིས་ལོན་པ་ཞིག་གིས། ཁུ་འགྱུར་གསལ་བའི་མཆོག་ལ་གདམས་པ་རྣམས་ཞུས་ནས་ཡར་བྱོན་ཏེ། བསམ་ཡས་འཆིམས་ཕུ་ན་བཞུགས་ཙ་ན། དབུ་རུ་ཞྭའི་མྱང་ཤེས་རབ་བྱུང་གནས་དགེ་སློང་བགྲེས་པོ་ཞིག་བཞུགས་འདུག་ནས། ཁོང་ན་རེ། བསྙེན་པར་རྫོགས་ནས་ལོ་ང་རྒན་ཀྱང་གདམས་པ་ཁྱེད་ཆེ་བར་འདུག་པས། སློབ་དཔོན་ཞུ་གསུང་ནས། གདམས་པ་རྣམས་མྱང་ཤེས་རབ་འབྱུང་གནས་ལ་གནང་ངོ༌། །མྱང་བྱང་ཆུབ་གྲགས་ནི། གཙང་རྒྱ་མ་ཉེའུ་ཁའི་ཕུང་པོ་རི་བོ་ཆེ་ལ་ད་ལྟ་འདུག་པའི་འཕྲོ་ལ། རི་ཟུར་ན་ཡར་ལ་སྐུ་སྤྲིན་ཆད་པ་བཞིན་དུ་ལྷག་མེད་དུ་གཤེགས།
མྱང་ཤེས་རབ་འབྱུང་གནས་ཀྱིས་འཆིམས་ཕུ། སྒྲགས་ཀྱི་ཡང་རྫོང༌། ཕུག་པོ་ཆེ་རྣམས་སུ་བཞུགས། མཇུག་ཏུ་ཕུག་པོ་ཆེ་ན་ཕུག་ཆུང་ཟུར་ར་རི་བྱ་བ་ཡོད་པས་དེར་བཞུགས་ཡོད་ཙ་ན། ཕུག་པོ་ཆེ་ལྷ་རིའི་རྩེ་མོ་ལ་ཤུག་པ་རྐང་གཅིག་ལ་ན་བཟའ་དང་ཕྲེང་བ་དང་ཀཱ་པ་ལི་རྣམས་གཟར་ནས་ཕུང་པོ་ལྷག་མེད་དུ་གཤེགས།
དེའི་སློབ་མ་སློབ་དཔོན་སྦ་སྒོམ་ཡིན་ཏེ། ཡུལ་ལོ་མོ་བ། རུས་པ་སྦ། ཡུལ་ན་འཁྲུག་པ་ཡོད་པས་ཡུམ་ན་རེ། བུ་འདི་སྲིང་མོ་དྲུག་གི་མིང་གཅིག་པོ་ཡིན། སློབ་དཔོན་མྱང་