[A:230]ཏི་སྒྲོར་བྱོན་པས་ཤེལ་ཕུག་ཏུ་ཁྲོ་བོ་བདུད་རྩི་འཁྱིལ་བ་ཞལ་མཐོང༌། མི་མ་ཡིན་ཞིག་གིས་བསྙེན་བཀུར་ཆེ་བ་བྱས། བཙུན་གཟུགས་ཞིག་ནམ་མཁའ་ལ་འཕུར་ནས་ཕར་འགྲོ་ཚུར་འགྲོ་བྱེད་པ་བཙལ་བས་མ་རྙེད། མི་ཡིན་མིན་མ་ཤེས་གསུང༌། དྭགས་པོ་ཞུ་རུར་ཨ་རྫི་བསྒྲུབས་པས་ཉི་མ་དྲོ་བར་ཁར་ཞལ་གཟིགས། དམ་བསྲེས་སྙམ་ཙ་ན་ཇོ་མོ་ཕྱལ་ལེ་བྱོན་པས། བུད་མེད་ཅན་ཟེར་ནས་ནམ་མཁའ་ལ་འོད་ཆེན་པོ་ཞིག་ཏུ་བྱས་ནས་སོང༌། ལྷ་ཟུར་དུ་བཅུད་ལེན་གྱི་སྒྲུབ་པ་བྱས་པས་ཚེ་དཔག་མེད་ཞལ་མཐོང༌། ཆོས་སང་པོའི་རྣམ་དག་རྒྱུད་ལ་ཤར། དེ་ནས་ཇོ་མོ་ཕྱལ་ལེ་དང་བྲལ་ནས་ཆོས་སྐྱིད་དང་འགྲོགས་ཏེ་འཛིན་དུ་བྱོན་ནོ། །དེ་ཡན་དུ་གདམས་པ་མང་དུ་མ་འཕེལ། བྱིན་པ་ཡང་འགའ་ཟུང་ལས་མེད། མཐུ་འགའ་རེ་བསླབས། གྲོང་མཆོག་མཛད་ཅིང་གསང་སྤྱོད་མཛད། དེ་ནས་ཐག་རིང་ནས་ཞུ་བ་ཡང་མང་དུ་བྱུང་ཞིང་མང་དུ་འཕེལ། ངོ་བོ་མཁར་ངོས་སུ་སྦལ་བུ་དོར་ལས་སྤྱན་དྲངས་ནས་གདམས་ངག་གསུངས་པས། ཉི་མ་སྔ་དྲོ་དང་པོ་ལ་འཇའི་གདུགས་དང་རེའུ་མིག་དང་ཀ་བ་ལྟ་བུ་མང་པོ་བྱུང་བ་ཐམས་ཅད་ཀྱིས་མཐོང་བས་ཕྱོགས་སུ་ཕྱག་བཙལ། ཆོས་ཐོན་ནས་རི་ལོགས་ལ་སྐྱོ་སངས་ལ་བྱོན། འཇའ་དེ་བླ་མ་འདྲོངས་པ་མིན་ནམ། མི་དགའ་ལ་ཆེ་བྱས་པས། སློབ་དཔོན་སྦ་སྒོམ་ལ་འབར་སྟོན་ཤེས་རབ་གྲགས་སྤུན་གཉིས་ཀྱིས་གདམས་པ་འདི་ཞུས་པའི་དུས་སུ། ངམས་ཤོད་ལུང་པ་དང་ཕུག་པོ་ཆེའི་རི་ལོགས་ཁེངས་པ་ཙམ་བྱུང༌། གདམས་པ་འདི་ལ་འོང་བ་ཡིན་གསུང༌།