[A:239]ཚོམ་ཟ་ཞིང་རྣམ་སྣང་གི་ལྡེར་ཚོ་ལ་ཕྱག་བྱས་གུས་པས་ཀྱང་ཐེ་ཚོམ་ཟོས་པའི་གཏམ་སྣང་ཞིང༌། ཐེ་ཚོམ་བཟློག་པའི་ཕྱིར་སྐྱབས་འགྲོ་ཡན་ལག་དྲུག་པ་མཛད་པ་ལས། རྒྱལ་བློན་ཡིད་ཆེས་མ་གྱུར་པས། སྐྱབས་འགྲོ་ཡན་ལག་དྲུག་པ་བྱས། ཞེས་ཀྱང་འབྱུང་ངོ༌། །འདིས་ཤེས་རབ་སྙིང་པོའི་རྒྱ་ཆེར་འགྲེལ་པ་དང༌། །རིམ་གྱིས་འཇུག་པའི་སྒོམ་དོན་དང༌། ཅིག་ཆར་འཇུག་པའི་སྒོམ་དོན་གཉིས་ཀྱང་མཛད་དེ། དེ་དག་གི་ཚུལ་ལ་བལྟས་ན་སློབ་དཔོན་ཀ་མ་ལ་ཤཱི་ལའི་རྗེས་ཙམ་ལ་བྱོན་པ་འདྲའོ། །བི་མ་ལ་མི་ཏྲ་ཕྱི་མ་ནི་སོ་སོར་ཐར་པའི་རྒྱ་ཆེར་འགྲེལ་པ་བམ་པོ་ལྔ་བཅུ་པ་མཛད་པ་པོ་སྟེ། རྟེན་ཡང་དགེ་སློང་དུ་འཐད་དོ། །བི་མ་ལ་སྔ་མས་སྙིང་ཐིག་གི་གདམས་པ་འདི་རྒྱལ་པོ་དང་མྱང་ཏིང་འཛིན་བཟང་པོ་གཉིས་ལ་གསུངས་ནས། དེ་ནས་བི་མ་ལའི་རྒྱའི་ཡུལ་དུ་བྱོན།
མྱང་ཏིང་ཛིན་བཟང་པོ་འདི། རྒྱལ་པོ་སྐུ་ཕྲ་བའི་དུས་སུ་བཙའ་བའི་བུ་རྫི་ཡིན། ཕྱིས་རབ་ཏུ་བྱུང་བ་ལ་རྒྱལ་བློན་རྣམས་བགྲོས་ནས། རྐྱེན་རིས་བཟང་པོ་བྱིན་པའི་ཡི་གེ་ཆུ་དར་ལ་བྲིས་པ་ཞིག་ཀྱང་མཐོང་ངོ༌། ཁོང་གིས་སྙིང་ཐིག་ལ་ཉམས་ལེན་མཛད་པས། ལོ་ལྔ་བཅུ་རྩ་ལྔ་ན་རང་རྒྱུད་དག་སྟེ་ཕུང་པོ་ཟག་མེད་དུ་གྱུར། རྡོ་རྗེ་ལེགས་པས་ཁམས་སུ་སེར་བ་ཕབ་ནས་རྔ་མོའི་ཁལ་བརྒྱ་བཀལ་ནས་བྱུང་བ་ལ་ཁྲལ་བླངས་ནས། ནས་མང་དུ་བྱུང་བའི་རྒྱུས་དབུ་རུ་ཞྭའི་ལྷ་ཁང་བཞེངས། དེར་སྙིང་ཐིག་གི་གདམས་པ་གཏེར་དུ་སྦས། ཚིག་བརྒྱུད་རྣམས་འབྲོམ་རིན་ཆེན་འབར་ལ་བཤད། དེས་སྦས་བློ་གྲོས་དབང་ཕྱུག་ལ་བཤད་པས་ན།