[A:279]གཏོགས་གདམས་པ་རྫོགས་པར་གནང༌། ཕྱིས་ཡུལ་དུའང་སྤྱན་དྲངས། དབང་རྒྱས་པར་མཛད་པ་ཞུས། ལོངས་སྤྱོད་དཔག་ཏུ་མེད་པས་མཉེས་པར་བྱས། དེ་ནས་མ་གཅིག་ཉིད་གྲུབ་པ་བརྙེས་ཏེ། ཡུལ་ཉི་ཤུ་རྩ་བཞི་དང་མོན་བོད་ཀྱི་གནས་གཉན་ཟེར་བ་མང་པོར་བཞུགས་ཏེ་ཐུགས་དམ་མཛད་པ་དང༌། གཞན་ལ་དག་པའི་སྣང་བ་མང་པོ་བསྟན་པ་སོགས་ཤིན་ཏུ་མང་བར་མཛད་དེ་རྒྱས་པར་མ་སྤྲོས། བླ་མ་ཡང་སྔར་སྨོས་པ་རྣམས་དང༌། པནྚི་ཏ་བཻ་རོ་ཙ་ན་དང༌། དཔལ་ཆེན་རྒྭ་ལོ་དང༌། པུ་ཧྲངས་ལོ་ཙཱ་བ་དང༌། ཡེ་རབ་བ་རྣམས་ལ་ཡང་གཏུགས། མ་གཅིག་འདི་ལ་དཔལ་ཕག་མོ་གྲུ་པས་ཀྱང་ཐུག འཛེང་དྷརྨ་བོ་དྷི་ཞེས་བྱ་བའི་གྲུབ་ཐོབ་དེས་ཀྱང་མ་གཅིག་ཕུག་རོན་དུ་སྤྲུལ་པ་དང་མཇལ། འགོས་ཁུག་པ་ལྷས་བཙས་ཆོས་འཁོར་ཞིག་གི་གྲལ་དབུ་མཛད་པའི་སར་སྡེ་སྣོད་འཛིན་པ་རྒྱ་མཚོ་ལྟ་བུ་འདུས་པ་ལ། ཁོང་གི་ཉེ་གནས་མས་བརྩད་ཅིང་རྒལ་ལན་བགྱིས་པས། མཁས་པ་རྣམས་ཀྱིས་མ་ཐུབ་པ་ན། མ་གཅིག་ཉིད་ལྟ་ཅི་སྨོས་པས་བཀའ་བསྟན་བཅོས་གང་ལ་ཡང་མཁས་པའི་ཕུལ་དུ་ཕྱིན་པར་ཀུན་ལ་མངོན་དུ་གྱུར། འགྲོ་དོན་རྒྱ་ཆེན་པོ་མཛད། དགུང་ལོ་བརྒྱད་ཅུ་རྩ་བརྒྱད་པའི་ཚེ་གཤེགས་པའི་ཚུལ་བསྟན་ཏེ། སྤུར་སྦྱངས་ཀྱང་གདུང་ཅུང་ཟད་ཀྱང་མ་བྱུང་སྟེ། མདོར་ན་མ་གཅིག་འདི་ནི་སྤྲུལ་པ་མོ། གསང་སྔགས་ཆགས་ལམ་ལ་བརྟེན་པ་རྣམས་ཀྱི་མིག་གཅིག་ཏུ་གྱུར་པ་ཡིན་ནོ། །དེ་ལྟ་བུའི་མ་གཅིག་འདི་འཁྲུངས་པའི་ལོ་དེ་རྗེ་བཙུན་མི་ལའི་ཉི་ཤུ་རྩ་གསུམ་པ། འཁོན་དཀོན་མཆོག་རྒྱལ་པོའི་ཉི་ཤུ་