[A:287]སྲས་མོན་སྟོན་འབྱུང་གནས་ཤེས་རབ་ཅེས་བྱ་བ་མཁས་ཤིང་གཞན་དོན་གྱི་རླབས་ཆེ་བ་བྱུང་སྟེ། དེ་ནི་ལོ་བཅུ་གཉིས་ལོན་པ་ལ་ཞང་པོའི་ཕྱགས་ཕྱིར་ལ་སྟོང་སྙེ་ནམ་འདམ་ཕུག་ཏུ་བྱོན་ནས། རྨ་ལ་ཆོས་མང་དུ་གསན་ཞིང་ལོ་དྲུག་བཞུགས། དེ་ནས་སླར་འཕན་ཡུལ་དུ་ལོག་སྟེ། རང་ལོ་བཅོ་བརྒྱད་ལ་གཉེན་ས་ཕུག་པ། དར་ཡོན་ཏན་གྲགས། སྐྱི་རིངས་ཡོན་ཏན་སེང་གེ་གསུམ་ལས་དགེ་སློང་ཆིག་རྫོགས་མཛད་ཅིང༌། ཇོ་བོའི་ཆོས་རྣམས་གསན། ར་སྒྲེང་དུ་རྣལ་འབྱོར་པ་ཆེན་པོ་དང༌། དགོན་པ་བ་དང༌། ཆག་ཁྲི་མཆོག རྣལ་འབྱོར་པ་ཤེས་རབ་རྡོ་རྗེ་སྟེ་བཞི་ལ་བཀའ་གདམས་ཀྱི་གདམས་པ་མང་དུ་གསན། ལ་སྟོད་དུ་མེ་ལྷ་ཁང་པ་ལ་ཚད་མ་དང༌། གྲུབ་སྙིང་དང༌། བདེ་མཆོག་དང༌། ཕག་མོ་དང༌། དོ་ཧ་སོགས་གསན། དགེ་བཤེས་འཇང་པ་གཞོན་བྱང་ལ། མངོན་པ་གོང་འོག་དང་ས་སྡེ་ལྔ་ལ་སོགས་པ་གསན། རྔོག་ལེགས་ཤེ་ལ་ཉི་ཁྲི་མདོ་འགྲེལ་ཞུས། ཞང་སྣ་ཆུང་སྟོན་པ་ལ་མདོ་སྡེ་རྒྱན། རྒྱུད་བླ། འབྱེད་རྣམ་གཉིས། ས་སྡེ་ལྔ། སྡོམ་རྣམ་གཉིས་རྣམས་གསན། ཞང་པོ་མཐའ་བཞི་ལ་འདུས་པ་ཡེ་ཤེས་ཞབས་ལུགས་སྐོར་དང༌། འཇིགས་བྱེད་ཨ་ར་ཏའི་ལུགས་དང༌། བདེ་མཆོག་ལཱུ་ཧི་པ་དང༌། ཕྱག་རྡོར་བྷ་བ་མ་དང༌། ཡོ་ག་རྡོ་རྗེ་འབྱུང་བ་རྣམས་གསན། ལྷོ་ལ་ཡག་ཏུ་མར་པ་བྱ་ཟེ་བ་ལ། བདེ་མཆོག་ནག་པོའི་ཆོས་དྲུག་དང༌། རིམ་བཞི་ལམ་ལོངས་དང་བཅས་པ་གསན། སྟོད་ལུངས་འཕར་ཚང་དུ་སོ་ཆུང་བ་ལ། ཞི་བྱེད་མ་བུ་སྐོར་དྲུག་ཞུས། སྐམ་